2023-nji ýylyň 19-njy sentýabrynda «Ahal» futbol topary Saud Arabystanynyň «Al-Feýha» topary bilen AFK-nyň Çempionlar ligsynyň toparçadaky ilkinji duşuşygyny geçirdi. Tomaşaçylaryň uly gyzyklanmasyna mynasyp bolan oýun paýtagtymyzdaky «Aşgabat» stadionynda guraldy.

Duşuşygyň birinji ýarymynda hasap açylmady. Oýnuň 51-nji minudynda «Ahal» toparynyň kapitany Elman Tagaýew çep aýagy bilen uzakdan depip topy garşydaş toparyň derwezesine girizdi. Ildeşlerimiz öňe saýlanandan soň,  myhmanlar has-da işjeň oýnap başladylar. Ýöne «Ahal» futbol toparynyň türgenleri garşydaşlaryň yzly-yzyna guraýan hüjümlerini yza serpikdirip, ýeňişli hasaby saklamagy başardylar.

Netijede, duşuşyk 1:0 hasabynda «Ahal» futbol toparynyň hasabyna tamamlandy. Ildeşlerimizi we ähli futbol janköýerlerimizi begendiren «Ahal» futbol topary halkara derejeli ýaryş bolan Aziýanyn çempionlar ligasynda ilkinji şowly ädimini ätdi. «Ahal» indiki duşuşygyny myhmançylykda Birleşen Arap Emirlikleriniň «Al-Ain» topary bilen 3-nji oktýabrda geçirer. Şol gün «Al-Feýha» topary bolsa «Pahtakory» (Özbegistan) kabul eder.

Agabaý AKMYRADOW,

Türkmen döwlet bedenterbiýe we sport institutynyň sport žurnalistikasy hünäriniň 3-nji ýyl talyby.