Däp bolşy ýaly, ýurdumyzda iýun aýynyň başyndan çagalar sagaldyş merkezlerinde dynç alyş-sagaldyş möwsümi badalga aldy.

Mälim bolşy ýaly, döwletimiz okuw ýylyny üstünlikli tamamlan mekdep okuwçylarynyň tomusky dynç alyş möwsümini şadyýan, peýdaly we many-mazmunly geçirmekleri üçin ähli mümkinçilikleri döredip berýär. Hormatly Prezidentimiz Serdar Berdimuhamedowyň belläp geçişi ýaly, halkymyzyň saglygyny berkitmek, beden we ruhy taýdan sagdyn nesilleri kemala getirmek döwlet syýasatynyň ileri tutulýan ugurlarynyň biridir.

Häzirki wagtda ýurdumyzda sagaldyş merkezleriniň onlarçasy hereket edýär. Bu merkezleriň iş alyp barýan esasy ugurlarynyň biri hem çagalary bedenterbiýä we sporta çekmekdir.

Tomusky dynç alyş ýerleriniň çäklerinde türgenleşdiriş zallary, tennis kortlary, futbol, woleýbol, basketbol ýaly sport oýunlaryny oýnamak üçin sport meýdançalary ýerleşýär. Mundan başga-da, suwda ýüzmek boýunça ýaryşlary geçirmek üçin üsti ýapyk we açyk tomusky suw howuzlary bar.

Çagalaryň dynç alyş maksatnamasy dürli sport, aň we döredijilik bäsleşiklerini, sergileri, bäsleşikleri özünde jemleýär. Bu ýerde dynç alýan dürli ýaşdaky çagalar olara uly höwes bilen gatnaşýarlar.

Dynç alyş merkezindäki tomusky dynç alyş keýpiçaglygy, begenç we şatlyk duýgularyny, täze-täze täsirleri, täze dostlary wada berýär. Bu ýerde beden we ruhy taýdan berkän çagalar täze okuw ýylynda täze güýç bilen mekdep partalarynyň başyna geçerler.

«7/24.tm»