Türkmenbaşy şäheriniň «Deňizçi» topary futzal boýunça ýurdumyzyň Naýbaşy ligasynyň ýeňijisi boldy. Sekiz toparyň gatnaşmagynda geçirilen Naýbaşy futzal ligasynyň ýeňijisi dört aýlawyň dowamynda geçirilen oýunlarda kesgitlenildi.
Çempionatyň soňky tapgyrynda «Ahal» toparyny 6:3 hasabynda ýeňlişe sezewar eden «Deňizçi» umumylykda 72 utuk toplap, Türkmenistanyň Içeri işler ministrliginiň «Köpetdag» toparyny 3 utuk öňürtmegi başardy. 57 utuk toplan «Senagatbank» topary hormat münberiniň üçünji basgançagyna çykdy. Ýeri gelende bellesek, «Deňizçi» ýurdumyzyň Naýbaşy futzal ligasynda bassyr ikinji ýyl çempionlygyny gazandy.
Naýbaşy ligada ýeňiş gazanan Türkmenbaşy şäheriniň topary 2023-nji ýylda futzal toparlarynyň gatnaşmagynda geçirilýän AFK-nyň Çempionlar ligasynda çykyş etmäge mümkinçilik aldy.
Futzal birinjiliginiň jemi boýunça «Deňizçiniň» tälimçisi Ýakub Öwezow «Iň ökde tälimçi» diýlip yglan edilen bolsa, bu toparyň derwezeçisi Meretgeldi Baýramow «Iň ökde derwezeçi» baýragyna mynasyp görüldi. «Janköýerleriň söýgüsine mynasyp bolan oýunçy» baýragy «Daşoguz» toparynyň oýunçysy Hamid Menglibaýewe gowşuryldy.
Iň köp top geçiren oýunçylaryň arasynda tapawutlanan «Köpetdagyň» futzalçysy Gurbangeldi Sähedow «Iň ökde oýunçy» baýragyna mynasyp görüldi. «Feýr-pleý» baýragy bolsa TNGIZT toparyna gowşuryldy.
«Türkmen sporty» gazeti.
