Türkmenistanyň Sport we ýaşlar syýasaty ministrliginiň mejlisler zalynda dünýä, yklym çempionatlarynda hem-de halkara ýaryşlarynda medal gazanmagy başaran türgenlerimiziň sylaglanyş dabarasy geçirildi.

Ilki bilen ýurdumyzyň halypa sport hünärmenleriniň, tälimçileriň çykyşlaryna orun berildi. Bu ýerde Watanymyzda sport ulgamynyň ajaýyp ösüşleriniň many-mazmuny hakynda aýdyldy. 2025-nji ýylda paýtagtymyzda geçiriljek Sambo boýunça dünýä çempionatynyň ähmiýetinden söz açyldy. Beýleki çykyşlar hem täsirli maglumatlara diýseň baý boldy. Sylaglanýan ýaşlary tüýs ýürekden gutlan Türkmenistanyň Ýeňil atletika federasiýasynyň başlygy Hajy Rahmanow şeýle üstünlikleriň dowamly boljakdygyny ynamly nygtady.

Şu ýylyň iýun-iýul aýlarynda geçirilen dünýä, Aziýa çempionatlarynyň, halkara ýaryşlarynyň ýeňijileriniň sylaglanýan pursatlary has-da täsirli boldy. Ilki bilen Rustam Annamuhammedow, Babajan Iwadullaýew, Guwanç Begaliýew, Goçmyrat Jumaniýazow, Sabina Agajanowa, Begenç Baltaýew, Dinara Iwadullaýewa, Rano Uzakowa, Seýdulla Akmämmedow, Muhammetmyrat Babekow, Muhammet Kössekow dagynyň ady tutuldy we olara dabaraly ýagdaýda sowgatlar gowşuryldy. Kakageldi Ýegenbaýew, Nedir Allaberdiýew, Meýlis Niýazmeňliýew, Muhammetnyýaz Gurbandurdyýew, Rüstem Penjiýew, Çarymyrat Annagurbanow, Angelina Filippowa, Madina Aýdogdyýewa, Dinara Hallyýewa, Faride Mämedowa, Maksuda Egemberdiýewa dagynyň sylaglanýan pursatlary hem elçarpyşmalar bilen kabul edildi. Soňra Mergen Mämmedow, Weronika Rus, Akmyrat Akyýew, Gülzada Jorakuliýewa, Ýazberdi Paýanow, Atajan Atamyradow, Hajymyrat Geldimämmedow, Serdar Mämmedow hem-de Döwlet Ýoldaşew dagy ajaýyp sowgatlara eýe boldular.

Dabarada milli sportumyzy ösüşiň täze belentliklerine alyp barýan Arkadagly Serdarymyzyň adyna alkyş sözleri belentden ýaňlandy.

«Türkmen sporty» gazeti.