Türkmenistanyň Prezidenti Serdar Berdimuhamedow Karara gol çekip, 2024-nji ýylda Parižde (Fransiýa) geçiriljek XXXIII tomusky Olimpiýa we XVII tomusky Paralimpiýa oýunlaryna Türkmenistanyň milli ýygyndysyny taýýarlamak üçin Guramaçylyk komitetini döretdi we onuň düzümini tassyklady. Bu barada «www.tdh.gov.tm» habar berýär.

Parižde guraljak 2024-nji ýyldaky tomusky Olimpiýa oýunlary 26-njy iýuldan 11-nji awgust aralygynda, Fransiýanyň paýtagtyndaky Paralimpiýa oýunlary 28-nji awgustdan 8-nji sentýabr aralygynda geçiriler.

Medallar ugrundaky göreş Parižde geçiriljek Olimpiýa oýunlarynyň resmi açylyşyndan iki gün öň, ýagny 24-nji iýulda başlanar. 2024-nji ýyldaky tomusky Olimpiýa oýunlary 306 ýaryşy öz içine alýan 32 sport görnüşinden ybarat bolup, olaryň arasynda Olimpiýa oýunlarynyň maksatnamasyna ilkinji gezek goşulan breýking hem bardyr.

Parižde Olimpiýa oýunlary üçünji gezek geçiriler. Ondan öň 1900-nji we 1924-nji ýyldaky oýunlary Fransiýa kabul edipdi.