Aşgabatda Aziýa Futbol Konfederasiýasynyň tälimçileri taýýarlamak boýunça okuwy başlandy. Ony AFK-nyň mugallymy, futbol boýunça PRO hünärmen tälimçilik ygtyýarnamasy bolan Röwşen Muhadow geçirýär. Maksat Seýitgulyýew bilen Begenç Garaýew bolsa onuň kömekçileri.
Türkmenistanyň Futbol federasiýasynda habar berlişine görä, ýaş tälimçiler iki hepdäniň dowamynda nazary dersleri diňlärler we amaly sapaklara gatnaşarlar. Okuw maksatnamasyny tamamlanlaryndan soň, synaglardan üstünlikli geçen ýagdaýlarynda, olar AFK-nyň çagalar we ýetginjekler, şeýle hem höwesjeň toparlar bilen işlemek hukugyny berýän «C» derejeli tälimçilik ygtyýarnamasyny alarlar.
