«Ahalyň» futbolçylary AFK-2021 kubogy ugrundaky ýaryşyň 25-nji awgustda Özbegistanyň «Nasaf» topary bilen Karşy şäherinde garşydaşyň meýdançasynda geçiriljek zolaklaýyn duşuşygyň tamamlaýjy tapgyryna taýýarlygyň çäginde Türkmenistanyň ýaşlar milli ýygyndysy bilen (23 ýaşa çenli) iki synag oýnuny geçirdi.
Ýaşlar ýygyndysy bilen geçirilen ilkinji duşuşykda «Türkmennebitönümleri» Baş müdirliginiň topary 3 : 1 hasaby bilen ýeňiş gazandy, ikinjisinde bolsa 2 : 2 hasaby bilen deňme-deň oýnady.
«Ahal» şu ýyl AFK kubogynyň Merkezi zolagynyň finalyna ilkinji gezek çykdy. Türkmenistanyň wise-çempiony bu üstünlige Bişkekde geçen «E» topary boýunça saýlama ýaryşynda ýeňiş gazanyp, Täjigistanyň kubogyna mynasyp bolan Kulyab etrabynyň «Rawşan» toparyndan 3:1, Gyrgyzystanyň 12 gezek çempiony «Dordoý» toparyndan bolsa 2:0 hasabynda üstün çykmak bilen ýetdi.
AFK-2021 kubogynyň zolaklaýyn finalynda «Ahalyň» bäsdeşi Duşanbede «F» toparynda geçirilen beýleki saýlanma ýaryşyň netijesi boýunça kesgitlenildi. Şol ýaryşda Gyrgyzystanyň «Alaý» (4 : 0), Täjigistanyň «Hujand» (3: 0) we Türkmenistanyň «Altyn asyr» (2 : 0) toparlaryndan üstün çykan Özbegistanyň wise-çempiony «Nasaf» öňe saýlandy.
«Nasaf» futbol kluby 1986-njy ýylda Karşyda döredildi. Topar Özbegistanda («Pahtakor» we «Bunýodkor» bilen bir hatarda) iň meşhurlardan biridir. «Nasaf» 2015-ni ýylda Özbegistanyň kubogyna, 2016-njy ýylda Özbegistanyň Super kubogyna mynasyp bolan, 2011-nji ýylda bolsa AFK-nyň kubogyny gazanan ýeke-täk özbek klubudyr.
«Ahal» we «Nasaf» toparlary öň hiç haçan duşuşmady.
Bu kubogyň ýeňijisi 2021-nji ýylyň 26-njy noýabrynda belli bolar.
