Sportuň görnüşleriniň arasynda geçirilen pikir soraşmanyň netijesinde tennisiň sportuň giňden ýaýran 3 görnüşiniň biridigi belli edilipdir. Türkmenistanyň Sport we ýaşlar syýasaty ministrligi bilen Türkmenistanyň tennis federasiýasynyň bilelikde geçirmeginde guralan ýetginjekleriň arasyndaky ýurdumyzyň açyk çempionatyna 2020-nji ýylyň 30-njy oktýabrynda badalga berildi. 4-nji noýabra çenli dowam etjek bu bäsleşikde ýurdumyzyň ýetginjek tennisçileri özaralarynda güýç synanyşdylar.

Türkmenistanyň hemişelik Bitaraplygymyzyň 25 ýyllyk baýramyna bagyşlanan ýetginjekleriň arasyndaky ýurdumyzyň açyk çempionat «Aşgabat» köpugurly stadionynda geçirilýär. Geljekde ýurdumyzda iri halkara ýaryşlaryny geçirmek meýilleşdirilýändigi bolsa milli derejeli bäsleşiklere bolan gyzyklanmany artdyrýar. 

Türkmenistanyň tennis federasiýasynyň halkara guramalary bilen işjeň aragatnaşyk saklaýandygy we iri halkara ýaryşlarynda yzygiderli çykyş edip durýandygy türgenleriň tiz kämilleşmegini we edilýän işleriň ýerine düşmegini üpjün edýär. Şeýle-de, sportuň tennis görnüşiniň çagalaryň arasynda hem giňden wagyz edilýändigi onuň muşdaklarynyň has-da köpelmegine täsirini ýetirýär. Şeýlelikde, ýokarda belläp geçişimiz ýaly, tennisiň dünýäde giňden ýaýramagyna Türkmenistanda hem mynasyp goşant goşulýandygyny aýtmak gerek.

Hemişelik Bitaraplygymyzyň 25 ýyllyk baýramyna bagyşlanyp geçirilýän ýetginjekleriň arasyndaky açyk çempionatyň mysalynda hem ýurdumyzda başarnykly tennisçileriň täze nesliniň ýetişip gelýändigine göz ýetirmek bolýar.