Täze möwsümden Türkmenistanyň çempionynyň Aziýanyň çempionlar ligasynyň topardaky bäsleşigine gatnaşýandygy, kubogyň eýesiniň AFC-nyň kubogynda çykyş etjekdigi Türkmenistanyň kubogyna bolan gyzyklanmany artdyrdy.

Baýrakly orunlar ugrunda göreşýän toparlardan tapawutlylykda, ýaryş tablisasynyň ikinji böleginde ýer alan toparlara kubok ýaryşy möwsümi netijeli tamamlamak üçin oňat mümkinçilikdir.

Türkmenistanyň kubogy ugrundaky ýaryşa 2020-nji ýylyň 27-nji oktýabrynda badalga berler. Bu bäsleşige Ýokary liga wekilçilik edýän toparlaryň 8-si («Altyn asyr», «Ahal», «Aşgabat», «Şagadam», «Nebitçi», «Merw», «Energetik», «Köpetdag») gatnaşar.

Türkmenistanyň Kubogy ugrundaky bäsleşigiň çärýek finalynyň birinji duşuşyklary 27-28-nji oktýabrda, jogap oýunlary bolsa 6-7-nji noýabrda geçiriler.

Kubok ugrundaky bäsleşigiň ýarym final duşuşyklary 28-nji noýabrda hem-de 2-nji dekabrda oýnalar. Final oýny bolsa 7-nji dekabrda geçiriler.