Türkmenistanyň Sport we ýaşlar syýasaty ministrliginiň «Türkmenistan Sport» halkara žurnalynyň hepdelik elektron goşundysynyň 13-nji sany okyjylara ýetirildi. Bu elektron neşiri «www.metbugat.gov.tm» saýtynyň «Gazetler» bölüminden alyp okap bilersiňiz.
Hepdelik elektron neşiriň täze sanynyň sahypalarynda çap edilen makalalar bilen tanyşdyrýarys. «Türkmenistanyň ýokary ligasy: sanlar we maglumatlar» atly materialda milli futbol çempionatymyzda çykyş edýän toparlar hakynda maglumat berilse, Türkmenistanyň Futbol federasiýasynyň resmi saýtyna salgylanyp berilýän habarda täze toparlarda işe başlan tälimçiler hakda gürrüň berilýär.
«Ýaýlymda ýaşyl meýdança» we «Ýaşyl meýdança» gepleşigi nähili döredi?» atly makalalaram okyjylaryň, esasanam futbol muşdaklarynyň göwnünden turar diýip pikir edýäris.
Halypa žurnalist Gurbangeldi Mämmetsähedowyň «Ýyllaryň ýakymly ýatlamasy» atly makalasynda tanymal žurnalistleriň durmuşyndan söhbet açylyp, olar bilen bagly gyzykly wakalar ýatlanylýar.
«Futbol topy hakynda goşgy» we «Monako» futbol topary» atly materiallaram okyjylarda gyzyklanma döretse gerek.
Ýewropanyň Çempionlar ligasynyň baýrak gaznasy bilen tanyşdyrýan habar bilen türkmen futbolçysy Arslanmyrat Amanowyň Aziýanyň kubogynda tora salan pökgisiniň iň owadan gollaryň sanawyna girendigi baradaky habar iňlis dilinde okyjylara ýetirilipdir.
Begenç Annaýewiň «Düýşdäki düýş» we Baky Amanýazowyň «Iki meşhur boksçy ringde duşuşýar» atly makalalarynda degişlilikde futbol we boks barada pikir ýöredilýär.
Dünýä belli žurnallaryň biri bolan «France Football» neşiri bilen tanyşdyrýan makala hem elektron goşundynyň täze sanynda ýerleşdirilipdir.
Şeýle-de, žurnalistiň gündeliginden diýen makalada ýaş žurnalistlere maslahatlar berilse, «Uly hasaplar ligasy atly teswirde Ýewropanyň «Türkmenistan: Sport» teleýaýlymy arkaly görkezilýän ýaryşlaryna syn berilýär.
Türkmenistanyň Sport we ýaşlar syýasaty ministrliginiň «Türkmenistan Sport» halkara žurnalynyň elektron goşundysynyň nobatdaky sanynda ýerleşdirilen makalalar okyjylarda gyzyklanma döreder diýip pikir edýäris.
www.msy.gov.tm
