Türkmenistanyň milli ýygyndysynyň ýarymgoragçysy Ruslan Mingazowyň çykyş edýän «Irtyş» futbol topary ýurduň birinjiliginde çykyş etmegini bes edýändigi hem-de bu babatda toparyň  ýolbaşçylarynyň ýurduň professional futbol ligasyna ýüz tutandyklary barada habar berilýär.

Resminamada futbol toparyň ýolbaşçylarynyň umumy ýygnagynda gelnen karara laýyklykda, maliýe serişdeleri sebäpli «Irtyşyň» 2020-nji ýylda Gazagystanyň çempionatynda çykyş edip bilmeýändigi beýan edilýär.

Şunlukda, Pawlodaryň «Irtyşy» çempionata gatnaşýan toparlaryň sanawyndan aýrylar we onuň gatnaşmagyndaky oýunlaryň ählisi ýaryş tertipnamasynda täzelener.

Ýadyňyzda bolsa, milli ýygyndymyzyň ezber oýunçysy Ruslan Mingazowyň çykyş edýän «Irtyş» futbol kluby Gazagystanyň 5 gezek çempiony (1993, 1997, 1999, 2002, 2003) bolupdy we ýurduň kuboguny (1997/98) eýelemegi başarypdy.

Saparnepes ATABAÝEW,

Balkanabat şäherindäki daşary ýurt dillerini çuňlaşdyryp öwredýän umumybilim berýän ýöriteleşdirilen 2-nji orta mekdebiň mugallymy.