2020-nji ýylyň 27-nji maýynda Aşgabat şäherindäki Olimpiýa şäherjiginiň tennis toplumy baýram lybasyna beslendi. Ýurdumyzyň paýtagtyna we welaýatlaryna wekilçilik edýän boksçylar Türkmenistanyň kubogy ugrundaky göreşe tutanýerli taýýarlandylar. Indi olar çekilen zähmetiň miwesini görmek üçin türkmen paýtagtyna ýygnandylar. Boks baýramynyň açylyş dabarasy aýdym-sazyň şirin owazy bilen utgaşyp gitdi.
2020-nji ýylyň 31-nji maýyna çenli dowam etjek boks boýunça Türkmenistanyň kubogynyň dowamynda iri halkara ýaryşlarynda ata Watanymyza mynasyp wekilçilik etjek ýaşlar saýlanyp-seçiler. Boksuň sportuň Olimpiýa görnüşleriniň sanawyna girýändigi bolsa ýaryşlaryň çekeleşigini artdyrar. Şonuň üçinem, Olimpiýa şäherjiginde guralan milli birinjiligiň açylyş dabarasy sözüň doly manysynda boks baýramy hökmünde ýatda galdy.
Sporty, ruhubelentligi we ata Watanymyzda ýetilýän belent sepgitleri wasp edýän aýdymlar bilen utgaşan dabarada çykyş eden Türkmenistanyň Sport we ýaşlar syýasaty ministrliginiň hem-de Türkmenistanyň boks federasiýasynyň jogapkär işgärleri ýaryşa gatnaşýanlara üstünlik we rowaçlyk arzuw etdiler.
Hojaberdi APBAÝEW.
