Şu gün (25.05.2020) Türkmenistanyň Sport we ýaşlar syýasaty ministrliginiň Ýaş olimpiýaçylary taýýarlaýyş mekdebinde 2019-2020-nji okuw ýylynyň tamamlanmagy mynasybetli «Soňky jaň» dabarasy geçirildi.
«Soňky jaň» dabarasy mynasybetli geçirilen baýramçylyk çäresi, 2020-nji ýylda mekdebi tamamlaýan okuwçy-türgenleri we olaryň synp ýolbaşçylaryny dabara bilen garşy almakdan başlandy. Soňra, Ýaş olimpiýaçylary taýýarlaýyş mekdebiniň direktory gutlag sözi bilen çykyş edip, baýramçylyk çäräsi açyk diýip yglan edenden soňra, dabara gatnaşýan myhmanlar, mugallymlar, tälimçiler, şeýle hem uçurymlar buýsanç bilen Döwlet Senasyny ýerine ýetirdiler.
Soňra baýramçylyk dabarasy bilen gutlamak üçin, Türkmenistanyň Sport we ýaşlar syýasaty ministrliginiň Sport mekdepleriniň işini we sport çärelerini guramak bölüminiň başlygy Eziz Garaýewe söz berildi. Gutlag sözünde myhman dabara gatnaşýan ata-eneleri, mugallym we tälimçileri ýurdumyzda giňden bellenilýän «Soňky jaň» dabarasy bilen gutlady.
Baýramçylyk dabarasy mekdebiň direktorynyň okuw we terbiýeçilik işleri hem-de sport işleri boýunça orunbasarlarynyň, mugallymlaryň we tälimçileriň, şeýle hem «Türkmenistan – Bitaraplygyň mekany» ýylynda mekdebi tamamlaýan uçurymlaryň ata-eneleriniň we uçurymlaryň gutlag sözleri bilen dowam etdi.
Mekdepde bilim we tälim alýan okuwçy-türgenleriň «Soňky jaň» dabarasy mynasybetli taýýarlan baýramçylyk çykyşlary dabara gatnaşmaga gelen myhmanlarda ýatdan çykmajak täsirleri galdyrdy.
Soňra mekdebiň ýolbaşçylary tarapyndan, 2019-2020-nji okuw ýylynyň netijesi boýunça bilimde we sportda tapawutlanan okuwçy-türgenler Azym Annamämmedow, Döwlet Ataýew, Didar Hallyýew, Daýanç Ýagşygeldiýew, Orazmuhammet Sylabow we Arslanbek Zakirbaýew dagylara, şeýle hem käriniň ussady halypa mugallymlar Mähri Anamuhammedowa, Aýa Jemilowa we tälimçiler Arslan Oraşewe, Osmanguly Handurdyýewe hormat hatlary gowşuryldy.
Dabaranyň soňunda ata Watanymyzy, hormatly Prezidentimizi wasp edýän aýdymlar ýaňlanyp, şular ýaly ajaýyp baýramçylyklaryň geçirilmegine giň mümkinçilikleri döredip berýän, türkmen sportunyň hak howandary Gahryman Arkadygymyza alkyş aýdyldy.
Juma JUMAÝEW,
Ýaş olimpiýaçylary taýýarlaýyş mekdebiniň direktory
