Türkmenistanyň futbol çempionatynyň 7-nji tapgyrynyň iki oýnunyň Ýeňiş baýramynyň bellenilýän güni geçirilmeginiň özboluşly aýratynlygy bar. Bu tapgyrda ýurdumyzyň çempiony «Altyn asyr» myhmançylykda «Nebitçi» bilen duşuşdy. Ýaryş tablisasynda dürli taraplarda orun alan iki komandanyň arasyndaky duşuşykda balkanabatly futbolçylar ýeňiş gazandylar. Olara ýeňiş getiren ýeke-täk pökginiň awtory Merdan Gurbanow Türkmenistanyň sport we ýaşlar syýasaty ministrliginiň resmi saýtynyň (www.msy.gov.tm) habarçysyna şeýle gürrüň berdi:
—Dogrusy, biz bu oýna tutanýerli taýýarlyk gördük. Ähli ünsümiz çempion bilen boljak oýunda jemlendi. Komandanyň agzybirligi, oýnuň şowlamagy, mümkinçilikleriň ýerlikli peýdalanylmagy — hemmesi birigip, «Altyn asyrdan» üstün çykmaga sebäp boldy. Üstesine-de, ýeňiş gazanmaga şahsy goşandymy goşmak miýesser edendigi ýakymlydyr. Nesip bolsa, geljekde hem şu depgini saklamak üçin elimizden gelenini ederis. Biz goldan janköýerlerimize aýratyun sagbolsun aýdýaryn! 
Şeýle-de, şu gün, ýagny Ýeňiş baýramynyň bellenilýän güni topardaşymyz Süleýman Derýaýewiň 20 ýaşyny doldurýandygy sebäpli, tora salnan goly hem, ýeňşimizi hem tutuş toparymyz bolup, oňa bagyşladyk. Bu gün Süleýman Derýaýew üçin goşa baýram bolandygy üçin onuň şatlygyny toparymyz bolup paýlaşdyk.
                                                       *** 
Ýarymgoragçy Merdan Gurbanow (30.08.1991) 2009-njy ýylda «Aşgabat» klubynyň düzüminde ýokary ligada çykyş edip başlady. «Ýedigen» we «Altyn asyr» komandalarynyň hatarynda Türkmenistanyň çempiony boldy. «Ahal» bilen Türkmenistanyň kubogyny eýeledi. 2017-nji ýylda Mogilýowyň «Dnepriniň» düzüminde çykyş eden wagty onuň tora salan goly Belarusiýanyň çempionatynyň iň owadan gollarynyň sanawynda ilkinji 3-lige girdi. 
                                                      *** 
7-nji tapgyrdan soňra «Nebitçi» 6 utuk toplap, ýaryş tablisasynda bir basgançak öňe süýşdi. «Altyn asyr» bolsa nobatdaky ýeňlişden soňra ýitiren utugy boýunça kerweniň başyny çekýän «Ahaldan» 6 utuk yzda barýar.