AHAL. Ahal welaýatynyň sport we ýaşlar syýasaty Baş müdirliginiň we Ahal welaýatynyň Medeniýet müdirliginiň bilelikde guramagynda sport çäresi geçirildi. Sporty mahabatlandyrmak hem-de ýaýbaňlandyrmak maksady bilen geçirilen bu çäre Akbugdaý etrabynyň sport mekdebinde guraldy. Türgenleriň we medeniýet işgärleriniň gatnaşan bu çäresinde önümçilik maşklary ýerine ýetirildi. Şeýle-de karate-do, milli göreş, fitnes boýunça türgenleşik işleri geçirildi.
***
BALKAN. «Türkmenistan Bitaraplygyň mekany» ýylynda Balkanabat şäheriniň mekdep okuwçylarynyň arasynda «Sagdyn ýaşlar bagtyýar geljegiň röwşeni» atly, Balkanabat şäher nebitçilik orta hünär okuw mekdebiniň talyplarynyň arasynda bolsa «Sagdynlygyň Watanydyr diýarym» atly wagyz-nesihat çäresi geçirildi.
Çykyş edenler hormatly Prezidentimiziň sporty ösdürmek syýasatyny ýaşlara düşündirmek, yaşlaryň arasynda ösen jemgyýete mahsus bolan sagdyn yaşaýyş-durmuş kadalaryny berkitmek, maşgalanyň hukuk derejesini ýokarylandyrmak, halkymyzyň mukaddes gymmatlyklaryna hormat goýmak ýörelgelerini ösdürmek boýunça giňişleýin gürrüň etdiler.
Bu çäreleriň ikisi hem Balkan welaýat sport we ýaşlar syýasaty müdirligi hem-de Balkan welaýat Baş bilim müdirligi bilen bilelikde guraldy.
***
DAŞOGUZ. Daşoguz welaýatynyň sport mekdeplerinde ýokanç keselleriň ýaýramak howpunyň öňüni almak we sagdyn durmuş ýörelgesini wagyz etmek maksady bilen wagyz-nesihat çäresi geçirildi. Çäre Daşoguz şäheriniň 4-nji çagalar we ýetginjekler sport mekdebinde, S.A.Nyýazow adyndaky etrabynyň 1-nji çagalar we ýetginjekler sport mekdebinde we 2-nji çagalar we ýetginjekler sport mekdebinde guraldy. Daşoguz welaýatynyň sport we ýaşlar syýasaty Baş müdirliginiň guramagynda geçirilen bu duşuşyga tälimçi mugallymlar we türgenler işjeň gatnaşdylar.
***
LEBAP. Lebap welaýatynyň Türkmenabat şäheriniň 62-nji çagalar bagynda hereketli milli oýunlary ösdürmek maksady bilen çäre geçirildi. Bu ýaryş körpeleriň arasynda «Sagdynlyk we ruhubelentlik» ady bilen guraldy. Ýaş nesliň sporta höwesini artdyrmak maksady bilen geçirilen bu ýaryş Türkmenistanyň Sport we ýaşlar syýasaty ministrliginiň «Türkmenistan» Ýaşlar bedenterbiýe-sport guramasynyň Lebap welaýat bölümi, Lebap welaýat sport we ýaşlar syýasaty Baş müdirligi tarapyndan guraldy.
***
MARY. Mary welaýatynyň sport we ýaşlar syýasaty Baş müdirliginiň guramagynda welaýatyň çägindäki sport mekdepleriniň tälimçileriniňdir okuwçylarynyň gatnaşmagynda Bütindünýä saglyk güni mynasybetli sport çäreleri geçirildi. Köpçülikleýin sport çäreleriniň dowamynda guralan görkezme çykyşlar başarnykly ýaşlaryň kändigini görkezse, çeper höwesjeňleriň çykyşlary dabara gatnaşanlaryň göwünlerini göterdi.
www.msy.gov.tm
