Halkara zenanlar güni mynasybetli edara-kärhanalaryň aýal-gyz işgärleriniň arasynda sportuň 64 öýjükli şaşka görnüşi boýunça Balkanabat şäheriniň şahsy birinjiligi geçirildi. Bu barada Türkmenistanyň Milli şaşka merkezi habar berýär.

Ýaryş Balkan welaýat sport we ýaşlar syýasaty Baş müdirligi, Türkmenistanyň Milli şaşka merkezi, Balkan welaýat ýöriteleşdirilen şaşka sport mekdebi we TDP-niň Balkan welaýat komiteti tarapyndan guraldy.

Ýaryşyň netijesi boýunça Balkanabat nebitçilik orta hünär okuw mekdebiniň mugallymy Şemşat Abaýewa 1-nji orna mynasyp boldy. Ikinji orny Balkan welaýat ýörite sungat mekdebiniň talyby Töpegül Baýramdurdyýewa we üçinji orny Halkara nebit we gaz uniwersitetiniň Balkanabat bölüminiň talyby Merjen Şiriýewa eýeledi.

Ýaryşyň ýeňijilerine Balkan welaýat sport we ýaşlar syýasaty Baş müdirliginiň Hormat hatlary we TDP-niň Balkan welaýat komitetiniň ýadygärlik sowgatlary gowşuryldy.

www.msy.gov.tm