Daşkent şäherinde geçirilýän (Özbegistan) agyr atletika boýunça 6-njy halkara raýdaşlyk çempionatynyň şol bir wagtyň özünde tomusky Olimpiýa oýunlarynyň saýlama ýaryşy bolup durýandygy oňa bolan gyzyklanmany ýokarlandyrdy.
Mary welaýatynyň sport we ýaşlar syýasaty Baş müdirliginiň 5-nji sport mekdebiniň agyr atletika boýunça tälimçisi Aýsoltan Toýçyýewa 87 kg agram derejesinde çykyş edip, silterläp (86 kg) we itekläp götermekde kümüş medal (117 kg) gazandy. A. Toýçyýewa umumylykda hem 203 kilogramyň hötdesinden gelip, kümüş medalyň eýesi boldy.
Türkmen döwlet bedenterbiýe we sport institutynyň (TDBSI) 3-nji ýyl talyby Rüstem Annadurdyýew 81 kg agram derejesinde çykyş edip, silterläp (147 kg) we itekläp (177 kg) götermekde bürünç medal gazandy. R. Annadurdyýew umumylykda 224 kg göterip, ýaryşy bürünç medal bilen tamamlady.
Türkmen döwlet bedenterbiýe we sport institutynyň 4-nji ýyl talyby Pirguly Pirgulyýew 89 kg agram derejesinde çykyş etdi. Ol itekläp götermekde 166 kg görkeziji bilen bürünç medal gazandy.
Şu ýaryşyň ilkinji günlerinde TDBSI-niň 4-nji ýyl talyby Ýulduz Jumabaýewa iki kümüş, bir altyn medal gazandy. Lebap welaýatynyň Sport we ýaşlar syýasaty Baş müdirliginiň Dänew şäheriniň 3-nji sport mekdebiniň tälimçisi Seýitjan Mirzaýew bürünç we altyn medalyň eýesi boldy. TDBSI-niň 3-nji ýyl talyby Kristina Şermetowa bolsa bürünç medallaryň 3-sini gazandy.
Daşkentde geçirilýän 6-njy halkara raýdaşlyk çempionaty 2020-nji ýylyň 12-nji fewralynda tamamlanar.
www.msy.gov.tm
