Şu gün (09.02.2020) ýokary okuw mekdepleriniň talypdyr mugallymlarynyň, Türkmenistanyň Sport we ýaşlar syýasaty ministrliginiň Ýaş olimpiýaçylary taýýarlaýyş mekdebiniň, «Olimp» orta sport mekdebiniň, şeýle-de, jemgyýetçilik guramalarynyň işgärleriniň, habar beriş serişdeleriniň wekilleriniň gatnaşmagynda köpçülikleýin Saglyk ýoluna ýöriş geçirildi. Dabaraly ýörişiň başynda guralan ýurdumyzyň medeniýet we sungat ussatlarynyň aýdym-sazly çykyşlary ýörişe gatnaşyjylarda ýakymly täsirleri galdyrdy.

Hormatly Prezidentimizi, türkmen sportuny wasp edýän aýdymlar şowhunly elçarpyşmalaryna mynasyp boldy. Gahryman Arkadagymyzyň parasatly ýolbaşçylygynda sport ýurduna öwrülen eziz Diýarymyzda uly ruhubelentlikde Saglyk ýoluny geçmek indi asylly däbe öwrüldi. Säheriň sergin howasyndan dem alyp, bu ýoly geçmegiň özboluşly aýratynlygy bar. Şu günki ýörişiň dowamynda şadyýanlyk, birek-birek bilen bäsdeşlik ýaryşlary, şeýle hem, uly ruhubelentlik höküm sürdi.

Ýörişe gatnaşyjylar «Türkmenistan – Bitaraplygyň mekany» ýylynda türkmen sportuny täze belentliklere alyp barýan Gahryman Arkadagymyza hoşallyk sözlerini aýtdylar.

Allanur ÇARYÝEW,

«Türkmen sporty» gazeti.