Ertir, ýagny 2020-nji ýylyň 9-njy fewralynda Italiýanyň çempionaty «Serie A»-da Milan şäheriniň iki wekili «Inter» bilen «Milan» duşuşar. «Derby della Madonnina» diýlip atlandyrylýan bu derbi Aşgabat wagty bilen 00:45-de başlar. Duşuşyk «Türkmenistan: Sport» teleýaýlymy arkaly futbol muşdaklarynyň dykgatyna ýetiriler.
Bir wagtlaryň iň uly derbilerinden diýlip görkezilýän Milan derbisi resmi duşuşyklary hasaba alanyňda 225-nji gezek oýnalar. Mundan ozalky 224 oýunda «Inter» 81, «Milan» 76 gezek ýeňiş gazandy. 67 oýun deňlikde tamamlandy. «Inter» 305, «Milan» 299 gol geçirdi.
Bir stadiony paýlaşýan we «Serie A»-da hersiniň 18 çempionlygy bolan iki toparyň arasynda iň netijeli oýun 1949-njy ýylda hasaba alnyp, «Inter» 6:5 hasabynda ýeňipdi.
Iň uly tapawutly ýeňiş gazanylan duşuşykda «Milan» 2001-nji ýylyň 11-nji maýynda «myhmançylykda» 6:0 hasabynda ezeli garşydaşyndan üstün çykypdy.
1909-njy ýylyň 10-njy ýanwaryndan bäri oýnalyp gelinýän Milan derbilerinde iň köp gol geçiren oýunçy Andreý Şewçenko bolup, ukrainaly hüjümçi 14 gezek tapawutlandy.
Soňky 18 resmi duşuşykda diňe 3 gezek ýeňen «Milan» möwsümiň 1-nji ýarymyndaky oýunda-da 2:0 hasabynda utulypdy.
