Kataryň Olimpiýa komitetiniň prezidenti şeýh Joan bin Hamad Al-Tani Aziýanyň Olimpiýa Geňeşiniň (AOG) başlygy wezipesine saýlanyldy. «Saýlawlar guramanyň Daşkent şäherinde geçirilen 46-njy Baş assambleýasynda geçirildi» diýip, «Turkmenportal»-yň habarçysy habar berýär.
«Aziýa Olimpiýa maşgalasynda iň uly we köptaraply yklymdyr. Ol biziň iň uly güýjümizdir. Emma ol birek-birege hormat goýmagy we Olimpiýa gymmatlyklaryna umumy ygrarlylygymyz esasynda agzybir bolmagymyzy talap edýär», — diýip, Aziýanyň Olimpiýa Geňeşiniň täze saýlanan ýolbaşçysy aýdýar.
Ol agzybirligiň netijesinde köptaraplylygy mümkinçiliklere öwürmegiň, milli Olimpiýa komitetleriniň ygtyýarlyklaryny giňeltmegiň hem-de ýaşlara dünýä sport meýdançasynda üstünlik gazanmak üçin mümkinçilik döretmegiň mümkindigini belledi.
Aziýanyň Olimpiýa Geňeşiniň prezidenti wezipesinde şeýh Joan bin Hamad Al-Tani saglyk ýagdaýy sebäpli wezipesinden möhletinden ozal giden Hindistanyň wekili Randhir Singhiň ornuny eýeledi.
