Döredilenine sanlyja ýylyň geçendigine garamazdan, Arkadag şäheriniň «Arkadag» futbol kluby nobatdaky Kubogyny gazandy. Balkanabat şäheriniň «Sport toplumy» stadionynda geçirilen ýurdumyzyň Naýbaşy kubogy ugrundaky duşuşykda «Arkadag» topary «Ahaldan» 3:1 hasabynda üstün çykdy.
14-nji minutda duşuşykdaky ilkinji gol hasaba alyndy. Şonda burçdan jerime meýdançasyna geçirilen topa ilki ýetişen Şamämmet Hydyrow tapawutlandy – 1:0. Duşuşygyň 22-nji minutynda Ş.Tirkişow oýnuň iň owadan goluny geçirmegi başardy. Şonda Şanazaryň jerimäniň sag gyrasyndan birnäçe oýunçynyň deňinden geçip, derwezä depen topuny derwezeçi Döwletýar Berdiýew nazary bilen ugradaýmakdan başga alaç tapmady. 29-nji minutda Ş.Hydyrow bilen Ş.Tirkişowyň sazlaşykly oýny nobatdaky gezek netije berdi. Şanazaryň burçdan dürs geçiren topuna ilki ýetişen Şageldi kelle urgusy bilen hasaby artdyrdy – 3:0.
75-nji minutda Begenç Orazmuhammedowyň daş aralykdan depen topuny R.Ahallyýew kynlyk bilen hem bolsa gaýtarmagy başarýar, ýöne topa ilki ýetişen Yslam Annamyradow ony derwezä gönükdirýär – 3:1. Öz döwründe Naýbaşy Kubok ugrundaky bäsleşikleriň birnäçesinde çykyş eden adygan futbolçymyz Ýagmyrmyrat Annamyradowyň ogly Yslamyň geçiren bu topunyň Kubok ugrundaky bäsleşikleriň 60-njy goly hökmünde hasaba alnandygy bellärliklidir.
Şeýlelikde, 2023-nji ýylda döredilen «Arkadag» topary 2 çempionlygynyň, 1 Kubok bäsleşigindäki gazanan Kubogynyň üstüni täze, Naýbaşy kubogy bilen ýetirdi.
Baş tälimçi Wladimir Baýramowyň ýolbaşçylygyndaky «Arkadag» toparynyň şu ýylyň dowamynda duşuşyklaryň 35-sine gatnaşandygyny bellemek gerek. Topar olaryň 29-syny Türkmenistanyň futbol çempionatynyň Ýokary ligasynda, 2-sini Kubok bäsleşiginde 3-sini bolsa AFK-nyň Çagyryş kubogynda geçirdi.
Şu ýyl ilkinji gezek halkara ýaryşyna gatnaşýan «Arkadag» toparynyň ýurdumyzdaky bäsleşiklerdäki ýeňişli ýoly halkara arenasynda hem dowam edýär. Toparçalaýyn bäsleşigi merkezleşdirilen görnüşde Kuweýtde geçirilen AFK-nyň Çagyryş ligasynyň «B» toparçasynda çykyş eden toparymyz Maldiw adalarynyň «Maziýa Sports», Gyrgyz Respublikasynyň «Abdyş-Ata» hem-de ýerli «Al-Arabi» toparlary bilen geçirilen duşuşyklarda netijeli çykyş edip, çärýekfinala çykmagy başardy. «Arkadag» toparynyň ýarymfinala barýan ýoldaky garşydaşy Hindistanyň «Ist Bengal» topary bolar. Bu toparlaryň arasyndaky duşuşyklaryň 2025-nji ýylyň 5-nji hem-de 12-nji martynda geçirilmegine garaşylýar.
«Türkmen sporty» gazeti
