Türkmen agyr atletikaçylary türgenleşik üçin Gruziýanyň meşhur Bakuriani gyşky sport-dynç alyş bazasyny saýladylar. Ol ýerde 52 ýaşly meşhur hytaýly hünärmen Lin Şoufengyň ýolbaşçylygynda 8 türgenden ybarat Türkmenistan milli ýygyndysy 20-nji iýuna çenli halkara ýaryşlaryna taýýarlanar.

Gruziýa giden toparymyzyň düzümi aşakdakylardan ybarat: türgenler Seýitjan Mirzaýew, Bunýad Raşidow, Bektimur Reýimow, Gaýgyzyz Töräýew, Şahzadbek Matýakubow, Dawranbek Hasanbaýew, Änamjan Rustamowa we birinji synpyň okuwçysy Asal Kerimbaýewa.

1991-nji ýylda ýetginjekleriň arasynda geçirilen dünýä çempionatynda bürünç medal gazanan, 1996-njy ýylda Atlantada geçirilen Olimpiýa oýunlaryna gatnaşan Lin Şoufeng, Türkmenistan milli ýygyndysynyň baş tälimçisi hökmünde geçen güýz aýlaryndan bäri türgenlerimiz bilen işleýär. Onuň ýolbaşçylygynda türkmen agyr atletikaçylary 2023-nji ýylyň dekabrynda Doha (Katar) şäherinde geçirilen halkara Gran Pri II ýaryşynda, 2024-nji ýylyň fewralynda Daşkentde (Özbegistan) Aziýa çempionatynda we şu ýylyň aprel aýynda Phuketdäki (Taýland) Dünýä kubogy ugrundaky bäsleşikde birnäçe medala eýe boldular.

Gruziýada geçirilmeli taýýarlyk türgenleşikde hytaýly hünärmen Lin Şoufeng agyr atletikaçylarymyzy Türkmenistan milli ýygyndysynyň baş tälimçisi Mansur Rejepow bilen bilelikde ýaryşlara taýýarlar.

«Türkmen sporty» gazeti