Türkmenistanly agyr atletikaçylar Peruwyň paýtagtyň Lima şäherinde geçirilen ýetginjekleriň arasyndaky dünýä çempionatyny 7 medal bilen tamamladylar. Olaryň 3-si altyn, ýene şonçasy bürünç, biri bolsa kümüş medaldyr.
Bu halkara ýaryşyna jemi 52 döwletden 282-e golaý türgen gatnaşýarlar.
Ýaryşda 102 kilograma çenli agramda çykyş eden türkmen türgeni Süleýman Jafarow dünýä çempiony boldy.
Ştangany birden götermekde 143 kilogram agyrlygy boýun egdiren Süleýman bu görnüşden altyn medal gazandy. Itekläp götermekde görkezen netijesi bolsa (170 kilogram) oňa bürünç medal getirdi. Iki görnüşiň jemi boýunça 313 kilogram (143+170) netije gazanan ildeşimiz umumy hasapda hem altyn medala mynasyp boldy.
Süleýmanyň ilkinji tälimçisi onuň kakasy Bagtyýar Jafarowdyr. Ýaş türgen häzirki wagtda Türkmenistanyň ýetginjekler ýygyndysynyň baş tälimçisi Ahmet Saryýewiň ýolbaşçylygynda türgenleşýär.
Çempionatda 49 kilogram agram derejesinde çykyş eden Ogulşat Amanowa üç medala mynasyp boldy. Ol ştangany birden galdyrmakda 77 kg netije bilen altyn medal gazandy. Ildeşimiziň itekläp götermekdäki 91 kg netijesi bürünç medal bilen bellenildi. Iki görnüşiň jemi boýunça gazanan 168 kg (77+91) netijesi bolsa Ogulşadyň umumy hasapda kümüş medal gazanmagyna getirdi.
Didarbek Jumabaýew 67 kilogram agram derejesinde tapawutlandy. Ol jemi 272 kilogram netije bilen (117+155) iki görnüşiň jemi boýunça dördünji orny eýeledi. «Olimp» orta sport mekdebiniň okuwçysynyň itekläp götermekde görkezen 155 kilogram netijesi bolsa onuň şu görnüşde bürünç medal gazanmagy üçin ýeterlik boldy.
«Türkmen sporty» gazeti
