Aşgabatda geçýän halkara hokkeý ýaryşynda baş baýrak urundaky oýny «Galkan» (Türkmenistan) we «ADIHIC-Kazan» (Russiýa Federasiýasynyň Tatarystan Respublikasy) oýnarlar. 3-nji orun ugrundaky oýun bolsa «Feniks» (Özbegistan) bilen «Volat» (Belarus) toparlarynyň arasynda oýnalar. Bu ýagdaý şu gün «A» we «B» toprlaryň jemleýji oýunlarynyň netijesinde belli boldy.
«A» toparyň 5-nji tapgyrynda Özbegistanyň «Feniks» topary Eýran Yslam Respublikasynyň «Ice Box Iran Mall» toparyny 6:1 (2:0, 3:1, 1:0) hasaby bilen utdy, Omanyň «Oman Nationals» topary bolsa Bahreýniň «Bahrain Ice Hockey Club» toparyny 3:2 (1:1, 1:1, 1:0) hasaby bilen utdy.
«B» toparda Belarusyň «Volat» topary Gyrgyz Respublikasynyň «Dordoi» kluby bilen üç tapgyrdaky esasy wagtda 1:1 (0:0, 0:0, 1:1) hasabynda deň oýnap, diňe owertaýmda garşydaşyndan 2:1 hasabynda üstün çykdy. Russiýanyň Tatarystan Respublikasynyň «ADHIС-Kazan» topary Gazagystanyň «Akmola» klubuny 6:1 (1:0, 2:0, 3:1) hasabynda utdy.
Toparlaryň jemleýji ýagdaýy
«A» topar: 1. «Galkan» ⸺ 12 utuk, 2. «Feniks» ⸺ 9 utuk, 3. « Ice Box Iran Mall» ⸺ 6 utuk, 4. «Oman Nationals» ⸺ 3 utuk, 5. «Bahrein Ice Hockey Club» ⸺ 0 utuk.
«B» topar: 1. «ADIHIC-Kazan» ⸺ 12 utuk, «Volat» ⸺ 8 utuk, 3. «Akmola» ⸺ 6 utuk, 4. «Dordoi» ⸺ 4 utuk, 5. «Team Turkey» ⸺ 0 utuk.
Final we 3-nji orun ugrundaky oýunlar 20-nji aprelde Gyşky oýun görnüşleri boýunça sport toplumynyň uly buzly meýdançasynda geçiriler.
«Türkmen sporty» gazeti.
