Paýtagtymyzyň Olimpiýa şäherçesinde stol tennisi boýunça Türkmenistanyň çempionaty geçirildi. Ýaryşa ýurdumyzyň ähli sebitlerinden bolan türgenleriň 120-si gatnaşdy.

Toparlaýyn ýaryşda erkekleriň arasynda-da, zenanlaryň bäsleşiginde-de Aşgabadyň topary altyn we kümüş medallara eýe çykdy. Erkekleriň arasynda üçünji orny Lebap welaýaty eýeledi. Gyzlaryň bäsleşiginde bolsa Mary welaýatynyň topary öňdäki üçlügi jemledi.

Stol tennisi boýunça ýurdumyzyň çempionatynyň erkekleriň arasyndaky ýekelikdäki ýaryşynda hem Aşgabadyň ýygyndy topary hormat münberinde ornaşdy. Alibek Jumanow iň güýçli türgen hökmünde bellige alynsa, Ylýas Allanazarow ikinji, Armen Babaýan üçünji boldy. Gyzlaryň ýaryşynda bolsa Enejan Ballyýewa hormat münberiniň iň ýokarky basgançagyna çykdy. Gözel Glyjowa ikinji, Nasiba Mämmedowa üçünji orunlary eýelediler.  

Erkekleriň jübütleýin ýaryşynda hem Aşgabadyň topary ýeňdi. Alibek Jumanow jübütleýin ýaryşda hem tapawutlandy. Ol öz agasy Guwanç bilen çykyş etdi. Ikinji orny Azarow hem-de Ahmedow eýelese, Allanazarow we Meredow üçünji boldy.

Gyzlaryň arasynda bolsa şu jübütler öňe saýlandylar: Ballyýewa we Begenjowa — ýeňiji, Berdiýewa hem Nurgeldiýewa — ikinji, Gökgäýewa we Glyjowa — üçünji.

Garyşyk bäsleşikde Ylýas Allanazarow hem-de Enejan Ballyýewa birinji orna mynasyp boldy. Jumanow bilen Araýewanyň topary kümüş, Azarow we Berdiýewa jübüdi bürünç medal gazandylar.

Federasiýanyň ýolbaşçysy Agamyrat Allanazarowyň belleýşi ýaly, şeýle ýaryşlaryň yzygiderli esasda guralmagy türgenleriň ösüş mümkinçiliklerini hem-de professionallyga uzaýan ädimlerini şertlendirýär.

Türkmenistanyň Bedenterbiýe we sport baradaky döwlet komiteti, ýurdumyzyň Stol tennisi federasiýasy hem-de Aşgabat şäheriniň bedenterbiýe we sport baradaky Baş müdirligi ýaryşyň guramaçylary hökmünde çykyş etdiler.

www. salamnews.tm