4 — 8-nji martda Keýptaunda (GAR) hokkeý boýunça ýetginjekleriň arasyndaky dünýä çempionatynyň üçünji diwizionynyň «В» toparçasyndaky duşuşyklar jemlendi. Şeýlelikde, tejribeli tälimçi Guwançmyrat Jepbarowyň ýolbaşçylygyndaky Türkmenistanyň milli ýygyndy topary kümüş medala mynasyp boldy.
«В» toparçada türkmen ýygyndysy bilen birlikde, Günorta Afrikanyň, Tailandyň hem-de Gonkongyň ýygyndylary çykyş etdi. Türkmen hokkeýçileri Tailandyň ýygyndy toparyny uly hasap bilen ýeňmegiň hötdesinden geldiler — 7:2. Türkmen ýygyndysynyň geçiren gollarynyň dördüsine Serdar Durdyýew awtorlyk etdi. Elman Isaýew, Perman Şamuhammedow hem-de Şöhrat Begliýew bir şaýbadan taşladylar.
Mundan başga-da, türkmen topary ýaryşyň ýer eýesini — Günorta Afrika Respublikasynyň ýygyndysyny uly hasap bilen ýeňmegi başardy — 6:2. Türkmenistanyň ýygyndysynyň ýeňişli ýolundaky ýeke-täk böwşeňlik Gonkongyň ýetginjekleri bilen geçirilen duşuşyga degişli boldy. Netijede Gonkongyň ýygyndy topary altyn, Tailandyň topary bolsa bürünç medallara eýe çykdy.
Türkmenistanyň ýygyndy toparyndan Isgenderhan Durdyýew we Serdar Durdyýew taşlanan şaýbalaryň sany boýunça ýygyndynyň iň netijeli oýunçylary boldular. Olaryň her biri dört şaýba awtorlyk etdiler.
