Ýakynda türkmen milli oýny bolan takylatdy boýunça 20 ýaşa çenli oglan-gyzlaryň arasynda Türkmenistanyň çempionaty geçirildi. Aşgabat şäheriniň bedenterbiýe we sport baradaky Baş müdirliginiň Ýöriteleşdirilen küşt we şaşka mekdebinde guralan birinjilige Lebap, Daşoguz, Ahal welaýatlaryndan hem-de paýtagtymyzdan türgenler gatnaşdy. Bäsleşikde Ýöriteleşdirilen küşt we şaşka mekdebiň tälimçisi Ýazbike Öwezowanyň şägirtleri üstünlikli çykyş etdiler.
Ýaryşda duşuşyklaryň her birinde oýunçylara 20 minut wagt berlip, wagt ölçegi elektron sagatlar arkaly kesgitlenildi. Ýeňijini mälim etmek üçin bäsleşige gatnaşyjylar 11 aýlawdan ybarat bolan duşuşyklara gatnaşdylar.
Şeýlelikde, oglanlaryň arasynda 10 utuk toplan Aşgabat şäherindäki ýöriteleşdirilen 132-nji orta mekdebiň okuwçysy Orazmyrat Ataýew 1-nji orna mynasyp boldy. Onuň bilen deň utuk toplan paýtagtymyzdaky ýöriteleşdirilen 130-njy mekdebiň okuwçysy Muhammet Rejepow goşmaça görkezijileriň netijesinde 2-nji orny eýeledi. 9 utuk toplan Aşgabat şäheriniň «Ruhnama» adyndaky ýöriteleşdirilen 28-nji orta mekdebiniň okuwçysy Resul Gündogdyýewiň çykyşy üçünji orun bilen tamamlandy.
Gyzlaryň arasynda Aşgabat şäheriniň ýöriteleşdirilen 68-nji orta mekdebiniň okuwçysy Gülälek Şamuhammedowa 1-nji orna mynasyp boldy. Lebap welaýatynyň Türkmenabat şäheriniň 9-njy orta mekdebiniň okuwçysy Niginabonu Çaryýewa 2-nji, TDBGI-niň talyby Ýazgül Arazowa 3-nji orunlary eýelediler.
Ýeňijilere Türkmenistanyň Bedenterbiýe we sport baradaky döwlet komitetiniň medallary we Hormat hatlary hem-de TMÝG-niň sowgatlary gowşuryldy. Şeýle hem ýaryşa gatnaşan iň ýaşajyk türgenlere Türkmen milli oýunlar merkeziniň Hormat hatlary gowşuryldy.
«Türkmen sporty».
