21-nji fewralda, Kazanda «Geljegiň Oýunlary» halkara sport oýunlarynyň resmi açylyşy bolup geçdi. Bu çäre fijital-sport dünýäsinde iň giň möçberdäki waka öwrüler.

«Geljegiň oýunlary» ýurtdaky iri multi-sport meýdançasy bolan «Kazan ekspo» meýdançasynda 107 ýurtdan (şol sanda Türkmenistandan)  2000-den gowrak türgeni jemledi. Oýunlara gatnaşýanlar bu sport görnüşiniň 21 ugry boýunça ýeňiş gazanmak ugrunda bäsleşerler. Türkmenistanly türgenler futbol we basketbol ýaryşlaryna gatnaşarlar. Oýunlaryň umumy baýrak gaznasy 10 million dollara barabardyr.

«Geljegiň oýunlarynyň» açylyş dabarasy interaktiw şowhun görnüşinde ýaýbaňlandy. Oýunlaryň guramaçylary we oňa gatnaşýanlar tomaşaçylara sport we oýun industriýasynyň täze tehnologiýalaryny görkezdiler. Dabaranyň maksatnamasynyň tamamlaýjy pursatlarynda ýaryşlaryň myhmanlaryna fijital-sportuň döreýşiniň «janlandyrylan taryhy» görkezildi. Guramaçylar, ähli maglumatlary lazer şowhuny arkaly janlandyrmak bilen, janköýerlere fijital hereketi hakynda gürrüň berdiler.

«Geljegiň Oýunlarynyň» başlangyç we toparlaýyn döwürleri Kazanda şu gün ― 22-nji fewralda başlanar.