Golaýda paýtagtymyzda 14, 16 we 18 ýaşa çenli ýaşlaryň arasynda nusgawy küşt boýunça Türkmenistanyň birinjiligi geçirildi. Ýaryşda medallar toplumynyň 6-sy ugrunda göreş alnyp baryldy. Bäsleşige 200-den gowrak küştçi gatnaşdy.
16 ýaşa çenli gyzlaryň arasynda Gülmira Seýilhanowa mümkin bolan 9 utukdan 9-syny toplady. Mähri Aýmakowa ikinji orny eýeledi. Üçünji orna Mary welaýatyndan Jennet Ýalkanowa mynasyp boldy.
14 ýaşa çenli gyzlaryň arasynda Lebap welaýatynyň türgenleri tapawutlandylar. 8,5 utuk jemlemegi başaran Jahan Rejepowa ýeňiji boldy. Ondan bary-ýogy ýarym utuk yza galan Mähri Agamyradowa hormat münberiniň ikinji basgançagyna çykdy. Öňdäki üçlügi geçen hepde 12 ýaşly gyzlaryň bäsleşiginde hem üçünji orny eýelän Nurhan Babanazarowa jemledi.
18 ýaşly gyzlaryň arasynda üçünji tapgyrdan soň ynamly öňdeligi saklan 17 ýaşly Leýla Şöhradowa ýeňşe ýetdi. Ol 7,5 utuk toplady. Ikinji orna Bägül Ezizowa mynasyp boldy. Bägül ýeňijiden bary-ýogy ýarym utuk yza galdy. FIDE-niň ussady Lala Şöhradowa hem-de sport ussatlygyna dalaşgär Merýem Agajanowa 6,5 utuk topladylar. Goşmaça görkezijiler boýunça Lala üçünji orna mynasyp boldy.
17 ýaşly oglanlaryň arasynda lebaply mekdep okuwçysy Serdar Baýramow tapawutlandy. Resul Begmyradow ikinji orny eýeledi. Ilhan Çaryýew üçünji orna eýe boldy.
18 ýaşa çenli ýaşlaryň arasynda bolsa Aşgabatda ýerleşýän Ýöriteleşdirilen küşt we şaşka mekdebiniň okuwçylary Amanmuhammet Hommadow bilen Ahmet Gubataýew birinji, ikinji orunlara mynasyp boldular. Bürünç medaly Baýram Baýramow eýeledi.
14 ýaşlylaryň arasynda Alihan Batyrow (Mary) birinji orny eýeledi. Ol 8 utuk toplamagyň hötdesinden geldi. Şondan ýarym utuk yza galan Aly Ahmedow (Aşgabat) ikinji, Rauf Ýusupow (Mary) bolsa üçünji boldy.
Nusgawy küşt boýunça geçirilen ýaryşda 9 medal gazanan (4 altyn,
2 kümüş hem-de 3 bürünç medal) Lebap welaýatynyň ýygyndysy toparlaýyn hasapda öňe saýlandy. Aşgabatly ýaşlaryň 4 medal (1 altyn, 1 kümüş hem-de 2 bürünç medal), Ahal welaýatynyň toparynyň bolsa 1 bürünç medal gazanandygyny bellemek gerek.
«Türkmen sporty» gazeti.
