2021-nji ýylda Türkmenistanyň Prezidenti tarapyndan Tatarystan Respublikasynyň baştutany Rustam Minnihanowa sowgat berlen türkmen alabaýy Ak Dost «Merkezi Aziýa owçarkasy» derejesi boýunça Russiýanyň kinologiýa federasiýasynyň çempiony boldy.
Bu habary türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň, Halkara Türkmen alabaý itleri assosiasiýasynyň hem-de Halkara Ahalteke atçylyk assosiasiýasynyň ýolbaşçylary bilen geçirilen duşuşykda yglan etdi.
Türkmenistanyň Halk Maslahatynyň Başlygy 15-17-nji ýanwarda Kazanda geçirilen Russiýanyň kinologiýa federasiýasynyň çempionatynda ýeňijileriň sylaglanandygyny, olaryň arasynda «Merkezi Aziýa owçarkasy» derejesi boýunça çempion bolan türkmen alabaýy Ak Dostuň hem bardygyny aýtdy.
Gahryman Arkadagymyz türkmen alabaýynyň eminleriň ýokary bahasyna mynasyp bolandygyny aýdyp, Halkara Türkmen alabaý itleri assosiasiýasynyň hem-de Halkara Ahalteke atçylyk assosiasiýasynyň ýolbaşçylaryna Russiýanyň kinologiýa federasiýasynyň çempiony bolan alabaýa berlen degişli güwänamany gowşurdy.
