Aýnur Amanowanyň ady sport janköýerlerine tanyşdyr. Ýurdumyzyň birnäçe gezek çempiony bolmagy başaran türgen gyz gatnaşan her bir halkara ýaryşyndan dürli derejeli medally dolanyp gelýär. Aýnury sporta höweslendiren ýurdumyzda giňden tanalýan öz döwrüniň ussat türgeni, tejribeli hünärmen Şirin Kubaýewadyr. Tälimçiniň tagallasy bilen, Batyr agadyr Gurbanaý gelnejäniň ýeke dikrary 8 ýaşynda sport dünýäsine gadam goýýar.
Irginsiz türgenleşikler arkaly Aýnur welaýat, ýurt çempionatlarynyň ýeňijisi bolýar. 2009-njy ýylda bolsa ol halkara ýaryşynda altyn medala mynasyp bolýar. Has takygy, türkmenabatly 13 ýaşly gyzjagaz Russiýa Federasiýasynyň Moskwa şäherinde dzýudo boýunça geçirilen halkara ýaryşa gatnaşýar we ähli garşydaşlaryndan üstün çykýar.
Şol üstünlikden başlanan ýol soňlugynda abraýly ýaryşlaryň dürli derejeli medallaryna beslendi. 2012-nji ýylda Russiýada guşakly göreş boýunça geçirilen dünýä çempionatynda bürünç medal gazanan Aýnur bir ýyl soňra ýene-de şol ýerde geçirilen dünýä çempionatynda kümüş medaly ýüzüne syldy. 2015-nji ýylda Eýranda alyş göreşi boýunça Aziýa çempionatynda bürünç, 2016-njy ýylda paýtagtymyzda sambo hem-de guşakly göreş boýunça Aziýa çempionatlarynda iki kümüş, 2017-nji ýylda paýtagtymyzda geçirilen Ýapyk binalarda we söweş sungaty boýunça V Aziýa oýunlarynda kuraş boýunça bürünç medal gazanan Aýnur aradan iki ýyl geçensoň, 2019-njy ýylda kuraş boýunça dünýä çempionatynda altyn medala mynasyp boldy. Şu ýerde Aýnuryň kuraş boýunça dünýä çempiony bolmagy başaran ilkinji türkmenistanly türgendigini aýratyn bellemek gerek.
Aýnuryň şondan soňky geçirilen halkara ýaryşlarda gazanan medallary hem az däl. Geçen ýyl Hindistanda geçirilen dünýä çempionatyndan Watanymyza bürünç medal bilen dolanan tejribeli türgen şu ýyl Hytaýda Aziýa oýunlarynyň synag ýaryşy hökmünde geçirilen yklym çempionatyndan we bu ýaryş bilen ugurdaşlykda geçirilen «World Series Pro» ýaryşynyň saýlama böleginden bürünç medal bilen gaýdyp geldi. Ýakynda ol Hytaý Halk Respublikasynyň Hançžou şäherinde geçirilen Aziýa oýunlarynda bürünç medal gazandy.
Aýnur Amanowa häzirki wagtda Türkmenabat şäherindäki 7-nji sport mekdebinde tälimçi bolup işleýär. Şu günler barha ýakynlaşýan Kuraş boýunça dünýä çempionatyna gatnaşjak milli ýygyndymyz ähli amatlyklary bolan Arkadag şäheriniň köpugurly sport toplumynda türgenleşýär. Bu abraýly ýaryşda milli ýygyndy toparymyzyň düzüminde çykyş etjek zenan türgenleriň 8-sini tejribeli tälimçi Şirin Kubaýewa türgenleşdirýär. Türgen zenanlar häzirki wagtda ýokary depginde türgenleşik işlerini alyp barýarlar.
― Paýtagtymyzda geçiriljek dünýä çempionatyna güýçli pälwanlar ýygnanar. Garşydaşlarymyz öň bilip, görüp ýören türgenlerimiz. Olaryň emellerini öwrenýäris, şolara garşy emelleri özleşdirýäris. Mahlasy, türgenleşiklerimizi güýçlendirip, yhlas bilen taýýarlanýarys. Nesip bolsa, arzuwym — altyn medal.
Bize Arkadag şäherinde ýokary derejede türgenleşmäge giň şertler döredildi. Biz munuň üçin Milli Liderimiz Gahryman Arkadagymyza, Arkadagly Gahryman Serdarymyza tüýs ýürekden sagbolsun aýdýarys – diýip, Aýnur Amanowa gürrüň berdi.
Bizem Aýnura we onuň topardaşlaryna abraýly ýaryşda üstünligiň ýaran bolmagyny arzuw edýäris.
Parahat MÄMMETNUROW,
Türkmenistanyň Telewideniýe, radiogepleşikler we kinematografiýa baradaky döwlet komitetiniň «Sport» teleýaýlymynyň teswirleýjisi.
