Hançžou şäherinde dowam edýän tomusky Aziýa oýunlaryna Türkmenistanyň ýygyndysy hem gatnaşýar. 1994-nji ýyldan bäri tomusky Aziadalara gatnaşyp gelýän Türkmenistanyň sport wekiliýeti Hytaýda geçirilýän yklym ýaryşynda sportuň 12 görnüşi boýunça çykyş edýär.

Olaryň arasynda Türkmen döwlet bedenterbiýe we sport institutynyň talyby Maýsa Pardaýewa ilkinji bolup hormat münberine çykdy. 57 kilogram agram derejesinde göreş düşekçesine çykan Maýsa Pardaýewa bürünç medal gazandy.

ХIХ tomusky Aziýa oýunlarynda Türkmenistana wekilçilik edýän türgenler kuraş boýunça bir kümüş we bir bürünç medala mynasyp boldular. 90 kilogramdan ýokary agram derejede Tejen Tejenow kümüş medal, 52 kilograma çenli agram derejede Aýnur Amanowa bürünç medal gazandy.

Türkmenistanly boksçy Baýramdurdy Nurmuhhammedow 71 kilograma çenli agram derejede ýarym finalyna çykyp, baýrakly orny eýelemäge mümkinçilik aldy.

Türkmen türgenleriniň çykyşlary dowam edýär. Hançžou şäherindäki tomusky Aziýa oýunlary 2023-nji ýylyň 8-nji oktýabrynda tamamlanar.

 «7/24.tm»: №40 (175), 2023