Türkmenistanyň Bedenterbiýe we sport baradaky döwlet komitetiniň ýolbaşçysy Gulmyrat Agamyradow Aşgabat şäherinde Belarus Respublikasynyň ýurtdaky ilçisi Wýaçeslaw Beskostyý bilen duşuşdy.
Duşuşygyň barşynda iki döwletiň arasynda sport babatda hyzmatdaşlygy pugtalandyrmagyň öňde durýan meseleleri, şol sanda türkmen türgenleriniň şu ýylyň 4 — 14-nji awgusty aralygynda Belarus Respublikasynda geçiriljek GDA agza döwletleriň II Oýunlaryna gatnaşmagy bilen bagly meseleler ara alnyp maslahatlaşyldy.
Belarus Respublikasy bu Oýunlary ýokary derejede kabul etmek üçin häzirden taýýarlyk görýär. Ýurduň ähli sebitlerini gurşap aljak ýaryşlar Minsk, Borisow, Brest, Witebsk, Gomel, Grodno, Žlobin, Mogilýew, Molodeçno, Orşa we Soligorsk şäherlerinde geçiriler. Sport ýaryşlarynyň resmi açylyş we ýapylyş dabaralaryny «Minsk-Arena» sport toplumynda geçirmek meýilleşdirilýär.
Sportuň basketbol, gandbol, kenarýaka woleýboly, kenarýaka futboly, kiçi futbol we otuň üstünde oýnalýan hokkeý görnüşleri boýunça geçiriljek Oýunlara Türkmenistandan wekilçilikli toparyň gatnaşmagyna garaşylýar.
GDA agza döwletleriň I Oýunlarynyň 2021-nji ýylyň sentýabr aýynda Tatarystan Respublikasynyň Kazan (Russiýa Federasiýa) şäherinde geçirilendigini ýatladýarys.
«7/24.tm»
