Eýranyň futzal ýygyndysynyň Aziýanyň kubogynyň (2022) saýlama ýaryşynda gyrgyz futzalçylaryndan üstün çykmagy Türkmenistanyň ýygyndysyna yklym ýaryşyna gatnaşmaga mümkinçilik berdi.

Eýranly futzalçylar Gyrgyzystanyň milli ýygyndysyndan 8:1 hasabynda üstün çykyp, toparçada 1-nji orny eýelediler. Bu netijäniň netijesinde Türkmenistanyň milli ýygyndysy Aziýa kubogynyň saýlama ýaryşynyň «Merkez we Günorta» birleşen zolagynyň «A» toparçasynda 2-nji orna düşdi. 2022-nji ýyldaky Aziýa kubogynyň saýlama ýaryşynda türkmen fuzalçylary Gyrgyzystanyň (3:1) we Maldiw adalarynyň (7:0) ýygyndylaryny utup, eýranly bäsdeşlerinden (0:3) bolsa ýeňildiler. Netijede, ildeşlerimiz 6 utuk topladylar.

Futzalçylarymyz bu üstünlige 37 ýaşly tälimçi Guwanç Kanaýewiň ýolbaşçylygynda ýetdiler.

Özbegistan, Täjigistan, Liwan, Bahreýn, Yrak, Saud Arabystany, Indoneziýa, Taýland, Oman we Wýetnam toparlary saýlama ýaryşlary arkaly eýýäm yklym ýaryşyna gatnaşmaga hukuk gazandylar.

Yklymyň iň güýçli 16 ýygyndysynyň gatnaşjak Aziýanyň kubogynyň final bölegi 2022-nji ýylyň 25-nji sentýabryndan 20-nji oktýabr aralygynda Kuweýtde geçiriler.

Türkmenistan Aziýa kubogyna taryhynda 7-nji gezek gatnaşar (2005, 2006, 2007, 2008, 2010, 2012).

www.tff.com.tm