Ýurdumyzyň başlangyjy esasynda BMG-niň Baş Assambleýasy tarapyndan «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň kabul edilmegi hem-de Türkmenistanyň Birleşen Milletler Guramasynyň Halkara söwda hukugy boýunça komissiýasynyň (UNCITRAL) agzalygyna 2022—2028-nji ýyllar üçin saýlanmagy Watanymyzyň halkara abraýynyň barha pugtalanýandygyndan habar berýär. Ýeri gelende ýatlasak, Watanymyzda guralan welosipedli çäreleriň ikisiniň Ginnesiň Rekordlar kitabyndan ornuny tapandygy ýurdumyzda welosipedli sporty ösdürmek ugrundaky taýsyz tagallalaryň aýdyň beýanydyr.

Şu gün paýtagtymyzda guralan çäre ýurdumyzyň başlangyjy esasynda BMG-niň Baş Assambleýasy tarapyndan «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň kabul edilmegine bagyşlandy. Bu çärede welosipediň jemgyýetçilik ulagy hökmündäki ähmiýeti giňden şöhlelendirildi. Elbetde, jemgyýetçilik ulagy hökmünde welosipediň ähmiýetine uly orun berilmegi Watanymyzda üstünlikli durmuşa geçirilýän ekologiýa syýasatynyň hem möhüm bölegi bolar.

Aşgabat şäheriniň sport we ýaşlar syýasaty Baş müdirliginiň guramagynda «Dünýä uzar ynsanperwer, hoşniýetli menziller, Arkadagly Serdarymyz, Size alkyş egsilmez» diýen at bilen geçirilen maslahat uly ähmiýeti bilen tapawutlandy. Bu ýerde edilen çykyşlarda BMG-niň Baş Assambleýasy tarapyndan «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň kabul edilmeginde Watanymyzyň orny bellenilip, döwletimiziň halkara guramalarynyň üns merkezinden ornuny tapýan ajaýyp başlangyçlarynyň dowamat-dowam bolmagy arzuw edildi. Watanymyzyň halkara abraýyny pugtalandyrmagyň ýolundaky ýadawsyz tagallalary üçin hormatly Prezidentimize hoşallyk bildirildi.

«Türkmen sporty» gazeti.