Ýakynda paýtagtymyzdaky Gyşky oýunlar sport toplumynyň sport zalynda ýaý atmak boýunça Türkmenistanyň çempionaty tamamlandy. Türkmenistanyň Sport we ýaşlar syýasaty ministrliginiň we Milli ýaý atyjylyk federasiýasynyň bilelikde guran ýaryşyna ýurdumyzda hereket edýän sport mekdepleriniň türgenleriniň 50-den gowragy gatnaşyp, başarnyklaryny görkezdiler.
Ilki ýaryş toparlaýyn görnüşde 2007-nji ýylda doglan we uly ýaşly türgenleriň arasynda geçdi. Netijede Aýna Orazgeldiýewa, Ylýas Orazgeldiýew we Wadim Merzlikin dagy öňdeligi eýeledi. Şöhrat Jumakuliýew, Kowsar Abbasowa, Didar Ýazgeldiýew dagy 2-nji, Jorakuly Jumaýew, Fahreddin Işçanow we Rahym Gurbanow 3-nji orunlara düşdüler. Soňky tapgyrda 2008-nji ýylda doglan we kiçi ýaşly türgenler nusgawy ýaýdan 12 metr aralyga ok atmakda bäsleşdiler. Çekeleşikli geçen bu ýaryş hem ökdeleri öňe saýlady. Netijede paýtagtymyzyň 5-nji sport mekdebiniň türgeni Ezizmuhammet Sähedow jemi 598 utuk toplap, hormat münberiniň ýokarky basgançagyna çykmagy başardy. Aşgabat şäherinden Alymuhammet Dosow 569 utuk bilen 2-nji we Yhlas Haknazarow 3-nji orunlary eýelediler. Bu ýaş aýratynlykda ýekeleýin görnüşde hem E.Sähedow, A.Dosow we Enaý Reýimowa dagy tapawutlanmagy başardylar.
Soňra ýaryş 2004 – 2007-nji ýylda doglan türgenleriň arasynda nusgawy ýaýdan 18 metr aralyga ok atmakda dowam etdirildi. Bu aralykda garşydaşlaryndan has köp utuk toplan Gurban Gurbanow (Aşgabat şäheri) 1-nji, Bähbit Gurbanow (Aşgabat şäheri) 2-nji, Äbilfäz Imamberdiýew (Mary welaýaty) 3-nji orunlara mynasyp boldular. Bu ýaş derejesinde ýekeleýin geçirilen ýaryşda Maede Abbasowa, Äbilfäz Imamberdiýew we Bähbit Gurbanow degişlilikde öňdäki orunlary eýelediler.
2003-nji ýylda doglan we uly ýaşly türgenleriň arasynda 18 metr aralyga ok atmakda Agajan Gullaşow (5-nji sport mekdebi), Şöhrat Jumakulyýew (Daşoguz welaýaty) we Wepa Sähedow (TMÝAF) dagy tapawutlanmagy başardylar. Ýekeleýin görnüşde hem Wepa Sähedow, Agajan Gullaşow we Polat Metdiýew (Lebap welaýaty) ýokary netije görkezdiler.
2005-nji ýylda doglan we uly ýaşly türgenleriň arasynda 70 metr aralyga nusgawy ýaýdan ok atmakda hem ýokary netije görkezen (602 utuk) Wepa Sähedow ýurdumyzyň rekordyny täzeledi. Şöhrat Jumakulyýew we Agajan Gullaşow nobatdaky gezek ýeňiş gazandylar. Bu aralyga ýekeleýin görnüşde hem şu türgenler garşydaşlaryndan tapawutlanmagy başardylar.
Soňra baş emin Aleksandr Çemariniň eminlik etmeginde geçen bu çempionat 18 metr we 50 metr aralyga tegekli ýaýdan ok atmakda uly ýaşly türgenleriň gatnaşmagynda dowam etdirildi. Ýaryşda Aşgabat şäheriniň 5-nji sport mekdebiniň türgenleri Georgiý Agiýarow, Şirin Babaýewa we Fahraddin Işçanow ýokary netije görkezmegi başardylar.
Ýeňijilere Hormat hatlarydyr ýörite Kuboklar gowşuryldy.
