Milli futbol cempionatymyzyň 6-njy tapgyr hakda kelam agyz. Türkmenistanyň futbol boýunça milli çempionatynyň 6-njy tapgyram tamamlandy. Altynjy tapgyryň gyzykly oýunlarynyň biri Maryda bolup geçdi. Düzüminde tejribeli Merdan Gurbanow çykyş edýän «Nebitçini» kabul eden «Merw» 2:0 hasabynda ýeňiş gazandy. Gollary 65-nji minutda Begenç Alamow (11 metrlik jerime urgusyndan), 86-njy minutda hem Rasim Gereýhanow öz adyna ýazdy. Şeýlelikde, 6 oýundan soň 3 utygynda galan «Nebitçi» 8-nji orunda galyberdi, «Merw» bolsa utuk sanyny 6-a ýetirip altynjy orna galmagy başardy.
Öz meýdançasynda paýtagtyň adybir «Aşgabadyny» kabul eden «Altyn asyr» uly hasap bilen ýeňşini baýram etdi. Myrat Annaýewiň 6-njy minutdaky, Altymyrat Annadurdyýewiň 16-njy we 40-njy minutlardaky, Begençmyrat Myradowyň 89-njy minutdaky golyna «Aşgabat» 85-nji minutda Nazar Tuwakelowyň goly bilen jogap berdi: «Altyn asyr» – «Aşgabat» 4:1. Ýöne Nazar Tuwakelowyň gaty owadan gol salandygyny belläp geçsek ýerlikli bolar. Şeýdip «aragatnaşykçylar» utuk sanyny 12-ä ýetirip ikinji ýere ornaşan bolsa, «Aşgabat» 10 utuk bilen 3-nji ýerde ýerleşýär. Eger şu oýunda «Altyn asyrdan» utuk alyp bilen bolsadylar, onda Suleýman Orazowyň topardaşlary ikinji ornuny saklap bilmek bilen uly şowhun turuzardylar.
Türkmenbaşydaky «Şagadam» – «Köpetdag» oýny milli çempionatymyzyň ezber ýarymgoragçysy Yhlas Magtymowyň «Menem bar» diýen sesi esasynda şöhlelendi diýesim gelýär. Şu möwsümde heniz Yhlasyňky kän şowlanokdy, 6-njy tapgyrda bolsa ol 29-njy minutdaky goly bilen toparyna möhim 3 utugy sowgat etdi: «Şagadam» – «Köpetdag» 1:0. Bu utuşdan soň «deňizýakalylar» top tapawudy bilen bolsa-da 4-nji orna geçdiler. «Köpetdagyňam» hasabynda «Şagadamyňky» ýaly 8 utyk bar, emma olar 5-nji orunda barýarlar.
Tapgyryň soňky oýnunda «Energetik» «Ahaly» utan bolsady, onda 8- utuklylaryň sany 3-e ýeterdi, 12 utuklylaram iki sany bolardy. Özara oýnuň netijesine görä-de «Altyn asyr» birinji orunda durardy. Ýöne bu beýle bolmady . Ahal 17-nji minutda Elman Tagaýewiň we 84-nji minutda Gurban Annaýewiň gollary bilem 2:0 hasabynda ýeňiş gazandy. Bu netije «Ahaly» 15 utuk bilen birinji orna galdyran bolsa, «Energetigi» 5 utuk bilen 7-nji orna ymykly ornaşdyrdy.
7-nji tapgyryň oýunlary 8-nji we 9-njy maýda geçiriler
«Köpetdag» – «Merw»
«Nebitçi» – «Altyn Asyr»
«Energetik» – «Şagadam»
«Aşgabat» – «Ahal»
Merdan BAÝAT,
sprort synçysy.
