2022-nji ýylda Katarda geçiriljek futbol boýunça dünýä çempionatynyň saýlama tapgyryna gatnaşýan Türkmenistanyň milli ýygyndysynyň 23 oýunçysy belli boldy.
Bu barada Türkmenistanyň milli ýygyndysynyň baş tälimçisi Ante Mişe mälim etdi.
Saýlama tapgyra gatnaşýan milli ýygyndymyzyň oýunçylarynyň 8-si paýtagtymyzyň «Altyn Asyr» toparynda, 7-si ýurdumyzyň wise-çempiony «Ahalda» çykyş edýärler. «Köpetdagdan» iki, «Aşgabat» bilen «Şagadam» toparlarynyň hersinden bir oýunçy ýygyndy toparymyzyň düzümine düşmegi başardy. 23 futbolçynyň 3-si daşary döwletlerde çykyş edýär. Bir oýunçy häzirlikçe hiç ýerde çykyş etmeýär.
Sanawdan görnüşi ýaly, tejribeli Ruslan Mingazow bilen Ahmet Ataýew alan şikesleri zerarly ýygyndy toparymyza kömek edip bilmezler.
Ýeri gelende bellesek, milli ýygyndymyz 5-nji sentýabrda myhmançylykda Şri-Lankanyň, 10-njy sentýabrda bolsa öz meýdanynda Koreýa Respublikasynyň ýygyndy toparlary bilen duşuşar. Bu ýygyndylardan başga-da saýlama tapgyrynyň «H» toparçasynda Liwanyň hem-de Demirgazyk Koreýanyň milli ýygyndylarynyň çykyş edýändiklerini ýatladýarys.
Ýygyndy toparymyz saýlama tapgyryň öňüsyrasynda BAE-niň Dubaý şäherinde okuw-türgenleşik ýygnanyşygyny geçirer.
MILLI ÝYGYNDY TOPARYMYZYŇ
DÜZÜMI:
Derwezeçiler: Mämmet Orazmuhammedow («Altyn Asyr»), Batyr Babaýew («Ahal»), Rahat Japarow («Köpetdag»);
Goragçylar: Mekan Saparow, Gurbangeldi Batyrow, Zafar Babajanow (hemmesi «Altyn Asyr»), Güýçmyrat Annagulyýew («Aşgabat»), Şöhrat Söýünow, Abdy Bäşimow, Serdar Annaorazow (hemmesi «Ahal»);
Ýarym goragçylar: Resul Hojaýew, Serdar Geldiýew (ikisi-de «Altyn Asyr»), Wezirgeldi Ylýasow, Merdan Gurbanow (ikisi-de «Ahal»), Yhlas Magtymow («Şagadam»), Döwletmyrat Seýitmuhammedow («Köpetdag»), Arslanmyrat Amanow («Lokomotiw», Özbegistan), Artur Geworkýan (häzirki wagtda hiç toparda çykyş etmeýär), Amir Gurbany («Nagaworld», Kamboja);
Hüjümçiler: Altymyrat Annadurdyýew, Murat Ýakşiýew (ikisi-de «Altyn Asyr»), Wahyt Orazsähedow («Dordoý», Gyrgyz Respublikasy), Didar Durdyýew («Ahal»);
Tälimçiler düzümi: Ante Mişe (baş tälimçi), Sandro Tomiç (derwezeçileriň tälimçisi), Maksim Belyh (tälimçi), Begenç Garaýew (tälimçi).
