Ozal habar berlişi ýaly, şu aýyň 5-ine badalga alan Türkmenistanyň küşt boýunça ýokary ligasynyň bäsleşikleriniň jemi jemlendi. Bu ýaryşa ýurdumyzyň ähli welaýatlaryndan türgenleriň onlarçasy gatnaşdy.
Türkmenistanyň Sport we ýaşlar syýasaty ministrliginiň hem-de Türkmenistanyň Küşt federasiýasynyň bilelikde tassyklan meýilnamasyna laýyklykda geçirilen bu ýaryşyň esasy maksady öňümizdäki halkara bäsleşiklerinde milli ýygyndymyzyň düzüminde 2020-nji ýylda Russiýa Federasiýasynyň Hanty-Mansiýsk şäherinde geçiriljek 44-nji Bütindünýä küşt olimpiadasynda çykyş etjek türgenleri saýlap-seçmekden ybarat boldy. Ýaryş FIDE-niň düzgüni boýunça aýlaw usulynda geçirildi.
Erkekleriň arasynda birinji orna halkara ussady Saparmyrat Atabaýew (15 oýundan 13,5 utuk) eýe boldy. Saparmyrat ýaşlaryň arasynda Türkmenistanyň birnäçe gezek çempiony we 2017-nji ýylda paýtagtymyzda geçirilen Ýapyk binalarda we söweş sungaty boýunça V Aziýa oýunlarynyň bürünç medalynyň eýesidir. Şeýle hem, 2016-njy ýylda Russiýa Federasiýasynyň Soçi şäherinde ýaşlaryň arasynda geçirilen dünýä çempionatynda 9 oýundan 7 utuk toplap, dünýä çempiony diýen ada mynasyp boldy. Onuň halypasy Türkmenistanyň at gazanan tälimçisi Aýdogdy Atabaýewdir. Häzirki wagtda ol öz dogany Maksat Atabaýew bilen türgenleşýär. Ikinji orna bolsa FIDE-niň ussady Azat Nurmämmedow (15 oýundan 13 utuk) eýe boldy.
Aşgabat şäherindäki 50-nji orta mekdebiň okuwçysy A.Nurmämmedow golaýda Daşkent şäherinde geçirilen Aziýa çempionatynda üstünlikli çykyş edip, iki altyn medal gazanmagy başardy. Onuň halypasy Türkmenistanyň at gazanan tälimçisi Serdar Annageldiýewdir. Üçünji orna sport ussatlygyna dalaşgär Şahruh Turaýew (15 oýundan 12,5 utuk) mynasyp boldy. Şeýle hem, 4-nji we 5-nji orunlary degişlilikde sport ussatlygyna dalaşgär Soltan Muradow bilen I derejeli küştçi Allaýar Şirliýew eýeläp, milli ýygyndymyzyň düzümine düşmegi başardylar.
Küşt boýunça ýokary liganyň bäsleşikleri gyzlaryň arasynda hem güýçli türgenleri öňe saýlady. Aşgabat şäherindäki Ýöriteleşdirilen küşt we şaşka mekdebiniň türgeni, Türkmen döwlet bedenterbiýe we sport institutynyň talyby, FIDE-niň ussady Jemal Öwezdurdyýewa 15 oýunda 12 utuk toplap, öz deň-duşlaryndan saýlanmagy başardy. Onuň tälimçisi Türkmenistanyň at gazanan tälimçisi Şöhrat Myratgulyýewdir. 2-nji orna 11 utuk bilen Ahal welaýatyndan sport ussatlygyna dalaşgär Hurma Weliýewa çykmagy başardy. Onuň tälimçisi – sport ussady Atamyrat Geldiýew. Lebap welaýatyndan FIDE-niň ussady Lala Şöhradowa bolsa 10,5 utugy bilen hormat münberiniň üçünji basgançagyna düşmegi başardy. Häzirki wagtda Lala Rozymyrat Gurbandurdyýewiň ýolbaşçylygynda türgenleşýär. Şeýle hem, FIDE-niň ussady Annagözel Mekanowa we I derejeli küştçi Aýşa Gubataýewa ilkinji bäşlige düşmegi başardylar.
Ýeňijiler Türkmenistanyň Sport we ýaşlar syýasaty ministrliginiň Hormat hatlary, TMÝG-niň medallary we TKA-nyň Milli merkeziniň ýadygärlik sowgatlary bilen sylaglandy
