Ýurdumyzda sporty ösdürmek boýunça durmuşa geçirilýän ägirt uly işler Türkmenistanyň sebit, yklym boýunça iri halkara ýaryşlaryň geçirilýän merkezine öwrülmegine getirdi. Indi ýurdumyzda dünýä derejesinde iň iri halkara ýaryşlar yzygiderli geçirilýär. Şeýle ýaryşlaryň ýokary derejede we guramaçylykly geçirilmegi bolsa Türkmenistanyň ýokary derejeli halkara ýaryşlaryny geçirmekde baý tejribe toplandygyndan habar berýär.

Aziýa Olimpiýa Geňeşiniň (OCA) Prezidenti şeýh Ahmad Al Fahad Al Sabahyň Aziýanyň VII kenarýaka oýunlaryny «Awaza» milli syýahatçylyk zolagynda geçirmek mümkinçiligine garamagy teklip edip, hormatly Prezidentimize ýüz tutmagy hem Türkmenistanyň iň uly halkara ýaryşlaryny ýokary derejede guramagy başarýandygynyň nobatdaky gezek ykrar edilmegi boldy.

2021-nji ýylda VI Kenarýaka Aziýa oýunlary Hytaýyň Sanýa şäherinde geçiriler. 2023-nji ýylda geçiriljek VII Kenarýaka Aziýa oýunlaryny Awaza syýahatçylyk zolagynda geçirmegiň teklip edilmegi Türkmenistanyň Aziýa olimpiýa hereketini ýaýbaňlandyrmakda yklym boýunça öňdebaryjy orunlary eýeleýändiginiň ýene bir gezek aýdyň subutnamasy boldy.