Berkarar döwletimiziň bagtyýarlyk döwrüniň hözirini görüp ýaşaýan watandaşlarymyz Türkmenistanyň Bitaraplyk hukuk ýagdaýyna eýe bolmagynyň 25 ýyllyk baýramçylygynyň şanly toýuna taýýarlyk görýärler. Türkmenistan döwletimiziň türgenleri hem bu şanly toýa özleriniň ýaryşlarda gazanýan ýeňişlerini sowgat etmegiň arzuwynda. Türkmenistanyň Hemişelik Bitaraplygynyň şanly 25 ýyllygyna bagyşlanan ýaryşlar ýurdumyzyň dürli künjeklerinde geçirilýär.

Muňa mysal edip, Türkmenistanyň hemişelik Bitaraplygynyň şanly 25 ýyllygy mynasybetli geçirilen welotrek boýunça Türkmenistanyň açyk çempionatyny agzap bolar. Çempionat paýtagtymyzda ýerleşýän Olimpiýa şäherjiginiň dünýä derejesindäki ölçegleriň ähli talaplaryna jogap berýän Welotrek sport toplumynda guraldy.

Şeýle ýaryşlaryň ýene biri tennis boýunça ýetginjekleriň arasynda guralan Türkmenistanyň açyk birinjiligidir. Çekeleşikli duşuşyklara baý bolan bu ýaryş türkmen tennisini has belent sepgitlere ýetirip biljek, geljegi uly bolan türgenleriň kändigini ähli aýdyňlygy bilen görkezdi.

Şanly baýramçylyk mynasybetli Atly sportuň konkur görnüşi boýunça Türkmenistanyň çempionaty geçirildi. Ýaryş Türkmenistanyň Sport we ýaşlar syýasaty ministrliginiň, Aşgabat şäher häkimliginiň hem-de «Türkmen atlary» döwlet birleşiginiň guramagynda geçirildi. Çempionat ýatdagalyjy pursatlara baý boldy.