Türkmenistanyň Sport we ýaşlar syýasaty ministrligi, Aşgabat şäher häkimligi hem-de «Türkmen atlary» döwlet birleşiginiň bilelikde guramagynda hemişelik Bitaraplygymyzyň 25 ýyllyk baýramy mynasybetli atly sportuň konkur görnüşi boýunça Türkmenistanyň çempionaty geçirilýär.
Atly sportuň dürli görnüşleri Türkmenistanda uly meşhurlyga eýedir. Çünki behişdi bedewlerimiz türkmen ýigitleriniň hemişe hemrasy bolupdyr. Gadymy döwürlerden bäri toýlarymyzda at çapylyp, göreş tutmak däp-dessurymyzyň aýrylmaz bölegine öwrülipdir. Häzirki wagtda bolsa atly sportuň konkur görnüşi hem ýaşlary özüne çekýär.
Her ýylda Türkmen bedewiniň baýramy mynasybetli uzak aralyga we konkur boýunça guralýan ýaryşlaryň mysalynda-da atly sportuň türkmenistanly wekilleriniň gazanýan üstünliklerine şaýat bolýarys. Bu günki gün bolsa olar hemişelik Bitaraplygymyzyň 25 ýyllyk baýramy mynasybetli geçirilen Türkmenistanyň çempionatynda üstünlikli çykyş edip, şanly senäni sowgatly garşylamagy maksat edinýärler.
