Ýurdumyzyň sport durmuşyny şöhlelendirýän «Türkmenistan Sport» halkara žurnalynyň täze sany, täze 2020-nji ýylyň bosagasynda çapdan çykdy.
Žurnal geçip barýan 2019-njy ýylda bolan sport wakalary hem-de ýetip gelen 2020-nji ýylda sport muşdaklaryna garaşýan wakalar hakynda gürrüň berýän giriş makalasy bilen açylýar.
Geçen ýylyň dowamynda hem biz Türkmenistanyň dünýä ýüzünde täze sport merkezi hökmünde dünýä jemgyýetçiligi tarapyndan ykrar edilmesiniň ençeme gezek şaýady bolduk. Bu ýagdaý Halkara sambo federasiýasynyň (FIAS) 2020-nji ýylda Sambo boýunça dünýä çempionatyny Aşgabatda geçirmek barada karara gelmegi bilen hem tassyk boldy. Ýene bir sport baýramçylygynyň, Futzal boýunça Aziýa çempionatynyň hem Aşgabatda geçiriljekdigi baradaky habar sport söýüjileriň şatlygyna şatlyk goşdy. Şu ýerde şeýle iri halkara sport ýaryşlarynyň geçiriljek ýeriniň saýlanyp alynmagynyň ýörite halkara guramalarynyň ygtyýarlylygyndadygyny, onuň hem bu mesele boýunça hemmetaraplaýyn pikir alyşmalardan soň netije çykarýandygyny bellemek möhümdir. Türkmenistanda geçirilýän şeýle abraýly halkara ýaryşlar, gözbaşyny asyrlaryň jümmüşinden alyp gaýdýan Olimpiýa oýunlary ýaly halklaryň arasyndaky dost-doganlygy, agzybirligi, parahatlygy şöhlelendirer. Hormatly Prezidentimiz Gurbanguly Berdimuhamedowyň Türkmenistany sport ýurduna öwürmek barada köpsanly başlangyçlary, hemmämiziň şaýat bolşumyz ýaly, özüniň oňyn netijelerini berýär.
Žurnalyň sahypalarynda türkmen alabaýyna bagyşlanan makala hem okyjylara hödürlenilýär. Hormatly Prezidentimiz Gurbanguly Berdimuhamedow özüniň «Türkmen alabaýy» atly kitabynda «Türkmen alabaýy adamkärçiligiň asylly ýörelgelerini özünde jemleýän «türkmençiligiň» batyrlyk, merdanalylyk, wepalylyk, sypaýylyk gatnaşyklarynyň alamatlandyrylmasydyr» diýip belleýär.
Alabaýyň taryhy hem deňsiz-taýsyz ahal-teke bedewleriniň taryhy ýaly halkymyzyň taryhy, medeniýeti bilen aýrylmaz baglydyr.
«Türkmenistan we dünýä sporty» atly sahypada Türkmenistanyň Sport we ýaşlar syýasaty ministrliginiň hem-de Milli Olimpiýa komitetiniň çagyrmagy boýunça Azianyň Ot üstündäki hokkeý federasiýasynyň wekili, tejribeli tälimçi Ali Zahidiniň türkmen paýtagtynda bolmagy hem-de tälimçiler we türgenler üçin okuw sapaklaryny geçendigi barada habar berilýär.
Şeýle hem okyjy bu sahypanyň üsti bilen Aşgabadyň Olimpiýa şäherjiginiň tennis desgalarynda Dewisiň kubogy ugrunda halkara ýaryşynyň tapgyrynyň 2020-nji ýylyň 8-nji iýunyndan 15-nji iýunyna çenli Aşgabatda geçiriljekdigi barada maglumaty hem okap biler.
Žurnalyň sahypalarynda sportuň gyşky görnüşleri boýunça makalalar hem ýerleşdirilipdir. Türkmenistanyň Prezidentiniň kubogy ugrundaky ýaryşda «Nesil» toparynyň ýeňiş gazanmagy hem-de buzda figuralaýyn typmak, şort-trek boýunça türgenlerimiziň gazanan üstünlikleri barada makalalar hem okyjylaryň göwnünden tursa gerek.
Öňde duran Tokio-2020 Tomusky Olimpiýa oýunlary bilen baglylykda, bu uly sport baýramçylygynyň geçiriljek şäheri hakynda örän gyzykly maglumatlar hem žurnalda çap edilipdir.
Habarçymyzyň erkin göreş boýunça Türkmenistanyň milli ýygyndy toparynyň baş tälimçisi Ýusup Melejäýew hem-de milli ýygyndymyzyň maslahatçy-tälimçisi Olimpiýa oýunlarynyň, dünýäniň we Ýewropanyň ençeme gezek çempiony Remezan Ibraýhanow bilen söhbetdeşligi hem okyjylarda gyzyklanma döretse gerek. Türkmenistanda erkin göreşi ösdürmegiň ýollary barada bu aç-açan gürrüňdeşligi «Döwrüň derwaýys gürrüňi» atly sahypa astynda okamak bolýar.
Häzirki wagtda ýurdumyzyň sport muşdaklary öňde duran Olimpiýa oýunlaryna gününi sanap garaşýarlar. Türkmen türgenleriniň Tokio Olimpiadasynda çykyş etmäge doly derejeli taýýarlyk görmekleri üçin mähriban Arkadagymyz tarapyndan döredilen ajaýyp şertler dogrusynda makalalar hem žurnalyň sahypalarynda öz ornuny tapypdyr.
2019-njy ýylyň güýzüniň ahyrky günleri Türkmenistanyň Tennis federasiýasynyň çagyrmagy boýunça Halkara konferensiýasyna hormatly myhman hökmünde gatnaşmak üçin, dünýä ýüzünde uly meşhurlyk gazanan rus tennisçisi Mihail Ýužnyý Aşgabada geldi. Žurnalyň habarçysy atly türgen bilen uly söhbetdeşlik gurady. Bu söhbetdeşlik nennis muşdaklaryny biparh goýmasa gerek.
Her ýylyň ahyrynda futbol janköýerleri dünýäniň iň güýçli futbolçysy üçin ses berlişigiň jemine sabyrsyzlyk bilen garaşýarlar. 2019-njy ýylda bu baýrak altynjy gezek «Barselonanyň» argentinaly hüjümçisi Lionell Messä gowşuryldy. «Messiniň altynjy altyn pökgisi» atly makala bu meşhur futbolçy hem-de onuň bäsdeşleri hakynda gürrüň berýär.
Žurnalyň täze sanynda başga-da döwrümiziň iň wajyp sport wakalary barada gürrüň berýän gyzykly makalalar kän. Olary okamak arkaly türkmen sportunyň özüniň şöhratly döwrüne gadam goýýandygy baradaky hakykata aňryýany bilen göz ýetirmek bolýar.
www.msy.gov.tm
