2019-njy ýylyň 29-njy dekabrynda Türkmenistanyň Prezidentiniň 2020-nji ýylda Ýaponiýanyn Tokio şäherinde geçiriljek tomusky Olimpiada gatnaşjak türgenleriň sport lybasyny tassyklap bermegi we 2020-nji ýylyň «Türkmenistan – Bitaraplygyň mekany» ýyly diýip yglan edilmegi mynasybetli hoşallyk maslahaty geçirildi.

Türkmenistanyň Sport we ýaşlar syýasaty ministrligi bilen Türkmen döwlet bedenterbiýe we sport institutynyň bilelikde geçiren hoşallyk maslahatyna Türkmenistanyň Sport we ýaşlar syýasaty ministrliginiň garamagyndaky sport mekdepleriň müdirleri, TDBSI-niň talyplary we professor- mugallymlary, şeýle-de sport görnüşleri boýunça federasiýalaryň ýolbaşçylary we wekilleri gatnaşdylar.

Çykyş edenler hormatly Prezidentimiziň 2020-nji ýylyň «Türkmenistan – Bitaraplygyň mekany» ýyly diýip yglan edip bermeginiň çuňňur many-mazmuna eýedigini buýsanç bilen belläp geçdiler. Türkmen Olimpiýaçylarynyň lybasynyň tassyklanyp berilmeginiň, olar hakynda yzygideri alada edilýändiginiň türgenleri has-da netjeli çykyş etmäge ruhlandyrýandygyny aýdyp, munuň üçin hormatly Prezidentimiziň adyna alkyş sözleri beýan edildi.

Türkmen döwlet bedenterbiýe we sport institutynyň «Sagdyn nesiller» aýdym-saz topary maslahata gatnaşyjylaryň öňünde çykyş etdi.

www.msy.gov.tm