Täze ýyl baýramynyň öňüsyrasynda Türkmenistanyň Sport we ýaşlar syýasaty ministrliginiň Mejlisler zalynda Türkmenistanyň agyr atletika boýunça milli ýygyndysynyň agzalaryny sylaglamak dabarasy geçirildi.
Dabara Türkmenistanyň Sport we ýaşlar syýasaty ministri D.Gulgeldiýew bilen Türkmenistanyň agyr atletika federasiýasynyň ýolbaşçysy B.Mätiýew, Türkmenistanyň Döwlet daşary ykdysady iş bankynyň Müdüriýetiniň başlygy R.Jepbarow gatnaşyp, türgenleri we tälimçileri ýetip gelýän Täze ýyl baýramy bilen gutladylar, şeýle-de olara sport ýaryşlarynda hemişe üstünlikleriň hemra bolmagyny arzuw etdiler.
Türkmenistanyň Sport we ýaşlar syýasaty ministrliginiň, Türkmenistanyň agyr atletika federasiýasynyň ýolbaşçylary, şeýle-de milli agyr atletika federasiýamyzyň resmi hemaýatkäri hökmünde çykyş edýän Türkmenistanyň Döwlet daşary ykdysady iş bankynyň Müdüriýetiniň ýolbaşçysy agyr atletikaçylary sylaglamak dabarasynda hormatly Prezidentimiz tarapyndan türgenleriň ýokary netijeleri gazanmagy üçin ähli mümkinçilikleriň döredilýändigini, türgenleriň bolsa şol alada mynasyp jogap bermek üçin edýän yhlasynyň ýerine düşýändigini belläp geçdiler.
2019-njy ýylyň dowamynda geçirilen dünýä we Aziýa çempionatlarynda, dünýä kubogynda, şol sanda Olimpiýa saýlama ýaryşlarynyň çägindäki halkara ýaryşlarda türkmenistanly agyr atletikaçylar üstünlikli çykyş etdiler.
Olar abraýly iri ýaryşlarda baýrakly orunlary eýelemek bilen hormat münberine çykyp, ata Watanymyzyň ýaşyl tuguny belentde parlatdylar. Şol bir wagtyň özünde eziz Diýarymyzyň sport abraýyny has-da belende götermäge özleriniň goşantlaryny goşdylar.
Türkmenistanyň milli ýygyndysynyň agzalarynyň görkezýän ajaýyp netijelerini ýetginjekler ýygyndymyzyň agzalary hem mynasyp dowam etdirip, dünýä çempionatynyň we beýleki ýaryşlaryň medallaryny gazandylar.
Agyr atltikaçy türgenler we olaryň tälimçileri özleri hakyndaky aladalary üçin hoşallyklaryny bildirip, hormatly Prezidentimiziň ynamyny ödemek we Tokio Olimpiadasyna mynasyp taýýarlanmak üçin yhlaslaryny gaýgyrmajakdyklaryna ynandyrdylar.
www.msy.gov.tm
