Türkmenistanda 2019-njy ýylda şaýat bolan sport wakalarymyz we 2020-nji ýylda geçiriljek sport ýaryşlary barada sport žurnalistleri öz täsirlerini paýlaşýarlar.
Çary Rejebow, «Çar tarapdan» radioýaýlymynyň sport synçysy:
–Türkmen sportunyň soňky onýyllyklarda geçen menzillerine syn edip, Türkmenistanda 2019-njy ýylda ýatdagalyjy wakalaryň juda kän bolandygyny aýtmak isleýärin.
Sport wakalaryny şöhlelendirmek baradaky sowal ýüze çykanda, türkmen türgenleriniň gazanýan üstünlikleriniň hatarynyň günsaýyn uzaýandygyny görüp guwanýarys.
2020-nji ýylyň bolsa sport wakalaryna has-da baý boljakdygy şu günlerden ýakymly duýgylary peşgeş berýär.
Türkmenistanly türgenlere Täze ýylda öňdäki möhüm ýaryşlarda, şol sanda Tokio Olimpiadasynda, Sambo boýunça dünýä çempionatynda, futzal boýunça Aziýa çempionatynda üstünlikleriň hemra bolmagyny arzuw edýäris!
Hormatly Prezidentimizi, ähi watandaşlarymyzy ýetip gelýän Täze ýyl baýramy bilen gutlaýaryn!
Hajymyrat Söýünow, sport synçysy:
–2020-nji ýylyň sport wakalary hakynda näçe aýtsaň hem az bolar diýip pikir edýärin. Bu ýylda dört ýylyň iri sport wakasy bolan Olimpiýa oýunlary, futbol boýunça Ýewropa çempionatynyň geçiriljekdigini bellemek gerek.
Sport wakalary hakynda soralsa, ilki bilen ýurdumyzda geçiriljek halkara ýaryşlardan futzal boýunça Aziýa çempionatyny, Sambo boýunça dünýä çempionatyny aýdyp bilerin.
2020-nji ýylyň sport wakalaryna baý boljakdygyny ýatladaýyn. Şol wakalara 2019-da badalga berlendigini hem bellemek gerek.
2019-njy ýylyň sport wakalary hakynda aýtjak bolsak, Döwletjan Ýagşymyradowyň guşagyny gorap, çempion bolmagyny aýratyn bellemek isleýärin.
Dünýä sportuna geçsek, «Liwerpulyň» Çempionlar ligasyndaky we klublaryň arasyndaky dünýä çempionatyndaky ýeňşini belläp bilerin.
Täze ýyl tutuş türkmen halky üçin düşümli bolsun! Gahryman Arkadagymyzyň ähli tutumly işleri rowaç alsyn!
www.msy.gov.tm
