23.12.2019. Türkmenistanyň telewideniýe, radiogepleşikler we kinematografiýa baradaky döwlet komitetiniň «Türkmenistan: Sport» teleýaýlymy bilen Türkmenistanyň Sport we ýaşlar syýasaty ministrliginiň bilelikde taýýarlaýan «Sport metbugatda» atly gepleşiginiň 10-njy sany Täze ýyl baýramynyň öňüsyrasynda ýaýlyma goýberiler.
Türkmenistanyň Sport we ýaşlar syýasaty ministrliginiň resmi web-saýtynda, «Türkmenistan Sport» halkara žurnalynda we «Türkmen sporty» gazetinde sport wakalarynyň şöhlelendirilişinden söhbet açýan bu gepleşikde 2019-njy ýylyň dowamynda sportda gazanylan üstünlikler barada giňişleýin gürrüň edilýär.
Şeýle-de, 2020-nji ýylyň ilkinji günlerinde badalga beriljek sport baýramy, ýagny futzal boýunça Aziýa çempionaty hakynda we dekabr aýyndaky möhüm sport ýaryşlary barada pikir alşylýar.
«Türkmenistan: Sport» teleýaýlymy arkaly yzygiderli tomaşaçylara ýetirilip durulýan «Sport metbugatda» gepleşiginiň täsirli bolmagy üçin «Türkmenistan: Sport» teleýaýlymynyň döredijilik toparynyň we tehniki işgärleriniň yhlas edýändigini aýtmak gerek.
