Horwatiýa Respublikasynyň Dubrawa şäherinde arbaletden we ýaý atyjylyk sporty boýunça aýlaw görnüşli jemleýji Dünýä kubogy ugrunda ýaryş geçirildi. Bäsleşikde Aşgabat şäheriniň sport we ýaşlar syýasaty Baş müdirliginiň 7-nji sport mekdebiniň tälimçisi Wepa Sähedow ýekeleýin arbalet atmak boýunça 2019-njy ýylda türgenleşige başlan türgenleriň arasynda 2-nji orna, şol mekdebiň türgeni Amanmyrat Beşerow 3-nji orna mynasyp boldular.
– Bäsleşikde geçen ýaryşlaryň ýeňijileri gatnaşdylar – diýip, Wepa Sähedow gürrüň berýär.
– Biz «Dostluk topary» ady bilen geçirilen ýaryşda çykyş etdik. Bäsleşige gatnaşmaga Türkmenistanyň Sport we ýaşlar syýasaty ministrligi ýardam etdi. Ýurdumyzda sportuň ýaý atmak görnüşiniň has-da ýaýbaňlanýandygyny bellemek gerek.
Hormatly Prezidentimiziň taýsyz tagallasy netijesinde türkmen türgenleri dünýäniň islendik künjeginde geçirilýän halkara ýaryşlaryna gatnaşýarlar. Bu bolsa türkmen sportunyň halkara abraýynyň has-da artmagyna ýardam edýär.
Şu gazanan ýeňşimiziň giňden bellenilip geçilen Halkara Bitaraplyk gününe özboluşly sowgat bolandygyna begenýärin. Türkmen sportunyň hak howandary Gahryman Arkadagymyzyň jany sag, il-ýurt bähbitli işleri mundan beýläk-de rowaç alsyn!
www.msy.gov.tm
