Futzal boýunça 2020-nji ýylyň 24-nji fewralyndan 10-njy martyna çenli aralykda Aşgabatda geçiriljek 16-njy Aziýa çempionatyna gatnaşjak toparlaryň 14-si belli boldy.
Häzirki wagtda saýlama oýunlaryň netijesinde Günbatar zolakda «A» toparçadan Kuweýt bilen Bahreýniň, «B» toparçadan Liwan bilen Saud Arabystanynyň ýygyndylary final tapgyrynda çykyş etmäge hukuk gazandy.
Kuweýt bilen Liwan 12-nji, Bahreýn 3-nji, Saud Arabystany 2-nji gezek çempionata gatnaşar. Bu zolakdaky goşmaça duşuşygyň ýeňijisi Oman hem Aşgabatdaky çempionata ýollanma almagy başardy.
Omanyň ýygyndysy ilkinji gezek gatnaşýar. Gündogar zolakda «A» toparçadan Hytaý (13-nji gezek gatnaşýar), «B» toparçadan 16-njy gezek Aziýa çempionatyna gatnaşýan Ýaponiýa ýollanma aldy. Bu zolakdan gatnaşjak 3-nji topar Mongoliýa bilen Koreýa Respublikasynyň ýygyndylarynyň arasynda oýnaljak duşuşykdan soň belli bolar.
Merkezi we Günorta Aziýa zolagyň saýlama tapgyryndan yklymyň öňdebaryjysy Eýranyň, Özbegistanyň, Gyrgyz Respublikasynyň (üçüsem 16-njy gezek gatnaşýar) hem-de Täjigistanyň (11-nji gezek) ýygyndylary Aşgabada gelmäge mümkinçilik aldy.
Şeýle-de, ASEAN zolagyndan Taýland (16-njy gezek) bilen Indoneziýanyň (10-njy gezek) ýygyndylary garşydaşlaryndan üstün çykyp, final tapgyryna ýollanma aldy. Bu zolakdan ýene bir topar goşmaça duşuşykdan soň belli ediler.
Umuman alnanda, ýer eýesi hökmünde çykyş edýän Türkmenistanyň milli ýygyndysy bilen bir hatarda, häzirki wagtda çempionata gatnaşjak 16 toparyň 14-si belli boldy.
