Hormatly Prezidentimiziň baştutanlygynda ýurdumyzda köpçülikleýin bedenterbiýe-sagaldyş hereketiniň köpçülikleýin häsiýete eýe bolmagyny gazanmak hem-de ýokary netijeli sporty ösdürmek babatda uly işler amala aşyrylýar. Milli Liderimiziň belleýşi ýaly, sport gujur-gaýratyň, gözelligiň, sagdynlygyň we ruhubelentligiň gözbaşydyr. Mähriban Arkadagymyzyň taýsyz tagallasy bilen eziz Diýarymyz dost-doganlygyň, sagdynlygyň, ruhubelentligiň ýurduna öwrüldi.

Ýurdumyzda talyp ýaşlaryň arasynda hem her ýylda dürli bäsleşikler geçirilýär. Ine, ýakynda Türkmenistanyň başlangyç we orta hünär okuw mekdepleriniň talyplarynyň arasynda 2019 – 2020-nji okuw ýylynda geçirilýän «Türkmenistan – ruhubelentligiň we sagdynlygyň ýurdy» atly XI Spartakiadanyň çäklerinde talyp gyzlaryň arasynda woleýbol boýunça bäsleşik geçirildi. Ýaryşda Aman Kekilow adyndaky mugallymçylyk mekdebimiziň topary bäsleşigiň final tapgyryna çykmagy başardy. Çekeleşikli ýagdaýda geçen final duşuşygynda hem talyplar toparymyz şowly çykyş edip, birinji orny eýeledi.

Toparyň oýunçylaryndan Daraýy Myradowa, Güljemal Amanowa, Akjemal Atabaýewa, Ogulşeker Hallyýewa, Laçyn Gutlyýewa, Nowçagül Garryýewa hem-de Gülendam Saparowa gowy oýun görkezdiler. Topary bäsleşige tälimçi-mugallymlar Parahat Geldiýew, Çaryguly Meredow, şeýle-de, Halmuhammet Ataballyýew dagy taýýarlady. Ýaryşyň bütin dowamynda erjel oýun görkezen Gülsenem Geldiýewa, Gurbansoltan Öwezmyradowa we Güljahan Segsenowa has-da tapawutlanmagy başardylar.

«Türkmen sporty» gazeti (26.10.2019)